Ráðgjafarfyrirtækið Expectus og Ráðum atvinnustofa hafa ákveðið að sameina krafta sína. Ráðgjafarfyrirtækið Expectus var stofnað fyrir sléttum fimm árum og hefur náð að vaxa og dafna síðan. Í dag vinna 20 starfsmenn hjá fyrirtækinu og sinna ráðgjöf á sviði stefnumótunar, rekstrar og upplýsingatækni. Ráðum atvinnustofa var stofnuð fyrir tveimur árum og sérhæfir sig í ráðningum og mannauðsráðgjöf.
„Við leitumst eftir því að koma á langtíma samstarfi við viðskiptavini okkar og sérstaða okkar liggur í sveigjanlegri nálgun á ráðningarverkefnið. Þannig höfum við komið til móts við þarfir stærri fyrirtækja með því að sjá um hluta ráðningarferilsins, t.d. bakgrunnskannanir, hæfnismat eða starfsæfingar. Krafan um faglegar ráðningar er alltaf að verða háværari því fyrirtæki og stofnanir eru búin að átta sig á kostnaðinum sem fylgir óvandaðri ráðningu. Ekki er óalgengt að kostnaðurinn nemi a.m.k. árslaunum viðkomandi starfsmanns, oft fast að tveimur árslaunum,“ segir Hildur Erla Björgvinsdóttir framkvæmdastjóri Ráðum.
