Lánshæfismatsfyrirtækið Standard & Poor's hefur lækkað lánshæfiseinkunn Och-Ziff Capital Management Group niður um flokk. Þessu er gerð skil í frétt MarketWatch . Það hefur því þokast niður úr efsta í næstaefsta flokk í hávaxtaflokki (ruslflokki).
Och-Ziff er einn af nýjum eigendum Arion banka, en Sculptor Investments s.a.r.l., sem er félag tengt Och-Ziff Capital Management Group á 6,6% í bankanum eftir lokað útboð á bankanum.
Í frétt MarketWatch kemur fram að S&P hefur fært lánshæfiseinkunn sjóðsins úr BB+ niður í BB flokk, og að framtíðarhorfur sjóðsins séu neikvæðar, vegna þess að rekstur sjóðsins hafi versnað á síðustu misserum. Á hálfu ári hefur gengi hlutabréfa Och-Ziff lækkað úr 4,49 dollurum niður í 2,56 dollara á hlut.
Í tilkynningu frá Arion banka vegna sölunni á bankanum kemur eftirfarandi fram um sjóðinn: „ Och-Ziff Capital Management Group er eitt af stærstu fyrirtækjum heims á sviði sérhæfðrar eignastýringar og er virði eigna í stýringu þess um 34 milljarðar dollara. Aðalstöðvar Och-Ziff eru í New York en fyrirtækið er einnig með skrifstofur í London, Hong Kong, Mumbai, Beijing, Shanghai og Houston. Meðal fjárfesta Och-Ziff eru lífeyrissjóðir, sjóðasjóðir, stofnanir og styrktarsjóðir, fyrirtæki og aðrar stofnanir, einkabankar og fjársterkir einstaklingar.“
