Í nýrri íbúðatalningu Samtaka iðnaðarins kemur fram að samdráttur er í byggingu íbúða í Reykjavík en í öðrum sveitarfélögum eru byggingarframkvæmdir frekar að taka við sér.

Þetta kemur fram á vef samtakanna, en í Reykjavík eru færri íbúðir í byggingu nú en í síðustu talningu sem framkvæmd var í september síðastliðnum.

Í Kópavogi, Garðabæ og Mosfellsbæ er verið að byggja fleiri íbúðir nú en í september. Í Hafnarfirði og á Seltjarnarnesi eru færri íbúðir í byggingu núna.

Á höfuðborgarsvæðinu eru núna 3.255 íbúðir í byggingu sem er 297 íbúðum fleiri en í september eða um 10% aukning. Aukningin kemur frá nágrannasveitarfélögunum en byggingamagnið dregst saman í Reykjavík.

438 færri íbúðir en samkvæmt spám

Íbúðalánasjóður segir eina helstu skýringuna vera sú að langan tíma hefur tekið að koma sumum byggingarverkefnum af stað jafnvel þótt byggingarleyfi liggi fyrir.

Byrjað hefur verið að byggja 438 færri íbúðir á höfuðborgarsvæðinu í ár heldur samtökin spáðu fyrir ári síðan að því er segir í fréttatilkynningu frá sjóðnum.

Hagdeild Íbúðalánasjóðs telur að talning Samtaka iðnaðarins varpi ljósi á mikilvægi bættrar áætlanagerðar í húsnæðismálum hér á landi.

Íbúðalánasjóði falin aðstoð við gerð húsnæðisáætlana

Áætlunargerð í húsnæðismálum er eitt af nýjum hlutverkum Íbúðalánasjóðs en með nýlegum breytingum á lögum um húsnæðismál var sjóðnum falið að aðstoða sveitarfélög landsins við gerð húsnæðisáætlana.

Sigrún Ásta Magnúsdóttir, sérfræðingur í hagdeild Íbúðalánasjóðs, segir niðurstöðurnar úr talningu Samtaka iðnaðarins sýna skýrt að áætlanagerð hafi verið ábótavant.

Sveitarstjórnarmenn byggi ákvarðanir sínar um skipulag, úthlutanir lóða og uppbyggingu innviða á spám og afar mikilvægt sé að þær séu áreiðanlegar.

Aldrei byggðar jafnstórar íbúðir

„Við sjáum að margt er athugavert við þróun framboðs á húsnæðismarkaði. Ekki eru byggðar nægilega margar íbúðir en einnig hafa aldrei verið byggðar jafn stórar íbúðir og á síðustu 5 árum,“ er haft eftir Sigrúnu Ástu í tilkynningunni.

„Þetta er á sama tíma og kallað er eftir hagkvæmari íbúðum sem fyrstu kaupendur og aðrir með lægri- og meðaltekur hafa efni á að kaupa eða leigja.

Við teljum að bætt áætlanagerð þurfi að koma til og þeir sem taka ákvarðanir sem hafa áhrif á verð og framboð húsnæðis séu betur upplýstir.

Áreiðanlegar upplýsingar um stöðu húsnæðismála í hverju sveitarfélagi fyrir sig og eftirspurn eftir húsnæði er lykilþáttur í því að stuðla að stöðugleika og sjá til þess að framboð húsnæðis mæti eftirspurn.“