*

þriðjudagur, 21. september 2021
Innlent 28. júlí 2021 11:20

Far­þegar verði að fram­vísa nei­kvæðu prófi

Frá og með 29. júlí mun PLAY ekki fljúga með farþega til landsins sem ekki geta framvísið vottorði um neikvætt COVID-19 próf við innritun.

Ritstjórn
Magnús Harðarson, forstjóri Kauphallarinnar, og Birgir Jónsson, forstjóri Play, fyrir framan flugvél Play.
Birgir Ísl. Gunnarsson

Frá og með morgundeginum, fimmtudeginum 29. júlí, mun PLAY ekki fljúga með farþega til Íslands sem ekki geta framvísað vottorði um neikvætt COVID-19 próf við innritun. Þetta kemur fram í tilkynningu.

Ákvörðunin er tekin með öryggi farþega og áhafna að leiðarljósi og í samræmi við reglugerð heilbrigðisyfirvalda sem tók gildi 27. júlí og kveður á um að farþegar þurfi að verða sér úti um vottorð um neikvætt COVID-19 próf áður en haldið er til Íslands.

PLAY mun bóka þá farþega sem ekki geta framvísað neikvæðu COVID-19 prófi í næsta flug félagsins frá sama áfangastað þeim að kostnaðarlausu, enda framvísi þeir þá neikvæðu prófi.

„Það er skylda okkar að tryggja öryggi farþega og áhafna og það kemur ekki til greina að PLAY hleypi fólki um borð án þess að reyna að tryggja að það sé ekki með COVID-19. Þetta er tímabundin ráðstöfun í þágu öryggis," segir Birgir Jónsson, forstjóri PLAY, í tilkynningunni.  

Með þessari tilhögun er PLAY ekki að bera brigður á rétt Íslendinga til að snúa til síns heima heldur þurfa þeir, sem ekki uppfylla reglur stjórnvalda, að sæta tímabundinni röskun í ljósi aðstæðna. Þá er ákvörðunin tekin í samræmi við skilmála PLAY þar sem meðal annars er kveðið á um heimild félagsins til að neita að fljúga með farþega sé það nauðsynlegt til að framfylgja lögum, reglugerðum eða tilmælum stjórnvalda eða til að tryggja öryggi annarra.

Jafnframt er það mat PLAY að ef flugrekandi framfylgir ekki reglum stjórnvalda, með því að hleypa fólki sem ekki framvísar COVID-19 prófi á flugvelli um borð í flug til landsins, missi reglurnar marks.

Stikkorð: Play