*

sunnudagur, 16. júní 2019
Innlent 29. janúar 2019 10:34

Farþegum mun fækka um 9% í Keflavík

Skiptifarþegum á leið yfir Atlantshafið mun fækka um nærri fimmtung frá fyrra ári ef ný spá ISAVIA gengur eftir.

Ritstjórn
Hlynur Sigurðsson framkvæmdastjóri viðskiptasviðs Keflavíkurflugvallar kynnti farþegaspá Isavia í morgun.

Í farþegaspá Isavia fyrir árið 2019 er gert ráð fyrir að heildarfjöldi farþega sem fara um Keflavíkurflugvöll í ár dragist saman um 8,7% frá því sem var árið 2018. Þetta kom fram þegar ríkisfyrirtækið kynnti nýja farþegaspá um fjölda farþega sem fer um Keflavíkurflugvöll árið 2019 á morgunfundi sínum á Hilton Reykjavík Nordica, í dag 29. janúar 2019.

Heildarfjöldi farþega er þó enn umfram þá langtímaspá sem gerð var vegna þróunaráætlunar Keflavíkurflugvallar frá árinu 2015. Komu- og brottfararfarþegum mun fjölga í sumar og aftur í lok árs og hlutfall skiptifarþega verður minna en í fyrra að því er ISAVIA spáir í nýrri farþegaspá fyrir árið.

Enn vantar að bæta við um 10.000 fermetrum við Flugstöð Leifs Eiríkssonar til að uppfylla alþjóðleg viðmið svo hægt sé að þjónusta betur þann fjölda farþega sem fer þar um á háannatíma segir ríkisfyrirtækið jafnframt.

Spánni seinkaði í ár vegna óvissu

Björn Óli Hauksson, forstjóri Isavia, sagði í opnunarræðu sinni að Isavia hefði síðan árið 2015 birt spá um fjölda farþega og vanalega í lok nóvember. Spánni fyrir 2019 hafi hins vegar seinkað vegna óvissu á markaði. „Við teljum þó stöðuna hafa skýrst umtalsvert undanfarið og erum við tilbúin að setja fram okkar sýn fyrir árið 2019,“ sagði Björn Óli.

Hlynur Sigurðsson, framkvæmdastjóri viðskiptasviðs Keflavíkurflugvallar, kynnti farþegaspá Isavia. Í erindi hans kom fram að spáin geri ráð fyrir að 8,9 milljón farþegar fari um Keflavíkurflugvöll í ár, samanborið við 9,8 milljónir í fyrra sem er 8,7% fækkun. 

Heildarfjöldinn í spánni fyrir 2019 er tæplega 200 þúsund fleiri en fóru í gegnum Keflavíkurflugvöll allt árið 2017. Í spánni fyrir 2019 er mest fækkunin í skiptifarþegum, en talið er að þeim muni fækka um 18,7% frá fyrra ári. Það skýrist helst af því að áfangastaðir munu að öllum líkindum fækka, sem og tíðni ferða til vissra áfangastaða. Þá hefur sætaframboð flugfélaganna áhrif á tengimöguleikana sem og farþegafjöldann.

Brottfararfarþegum fækkar hins vegar minna. Athygli vekur að komu- og brottfararfarþegum fjölgar yfir sumarmánuðina frá árinu 2018. Í júní verða þeir um 4% fleiri en á sama tíma í fyrra, þeim fjölgar um 5,7% í júlí og að lokum um 7,2% í ágúst. Þá gerir farþegaspáin ráð fyrir að komu- og brottfararfarþegum fjölgi í nóvember um 1,7% og í desember um 4,6%.

Fjöldinn enn langt yfir langtímaspá frá 2015

Í erindi Hlyns var einnig vísað í þá langtíma farþegaspá sem gerð var í tengslum við þróunaráætlun Keflavíkurflugvallar árið 2015. Þar kom fram að þrátt fyrir fækkun í ár þá sé fjöldi ferðamanna enn langt yfir langtímaspánni sem gerð var fyrir tæpum fjórum árum.

Hlynur vék einnig að uppbyggingarþörf á Keflavíkurflugvelli til að mæta þeim fjölda farþega sem áætlað er að fari um flugvöllinn í ár. Þar kom fram að til þess að betur væri hægt að þjónusta farþegafjöldann sem nú þegar fari í gegnum Keflavíkurflugvöll, þurfi að bæta um 10 þúsund fermetrum við flugstöðina og er fyrirhuguðum framkvæmdum ætlað að mæta því.

Hlynur fór einnig yfir niðurstöður alþjóðlegrar þjónustukönnunar – ASQ Survey – þar sem ánægja farþega er meiri milli ára þrátt fyrir uppbyggingaþörfina. Fer Keflavíkurflugvöllur úr 27. sæti árið 2017 í 17. sæti fyrir árið 2018. Um 110 flugvellir í Evrópu eru í  ASQ þjónustukönnuninni.

Fiskútflutningur til Bandaríkjanna þrefaldast vegna aukins flugs

Pétur Óskarsson, framkvæmdastjóri Íslandsstofu, ræddi í erindi sínu um ný lög um Íslandsstofu og breytt skipulag á samstarfsvettvangi atvinnulífs og stjórnvalda. Hann ræddi viðhorf erlendra ferðamanna gagnvart áfangastaðnum Íslandi og áhuga þeirra á íslenskum vörum. 

Flugið hefur opnað markaði og fjölgað viðskiptatækifærum innanlands, hvort sem um er að ræða vörur, þjónustu eða fjárfestingar. Til að mynda hafi útflutningur á ferskum fiski til Bandaríkjanna nánast þrefaldast frá árinu 2009 og má þakka betri og örari flugsamgöngum til og frá Bandaríkjunum fyrir það. 

25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is