Velta á fasteignamarkaði í vikunni dróst saman um 23% milli vikna og meðalupphæð á hvern samning heldur áfram að vera undir meðaltali líkt og í síðustu viku.
Fjöldi þinglýstra kaupsamninga var 82 í vikunni sem leið en 67 samningum var þinglýst í vikunni þar áður samkvæmt upplýsingum frá Fasteignamati ríkisins (FMR).
Á myndinni hér til hliðar má sjá breytingu á fjögurra vikna meðalveltu á milli ára. Fasteignasala sveiflast gjarnan mikið á milli vikna og þess vegna er horft til meðalveltu fjögurra vikna og breytinga á henni milli ára.
Í vikunni sem leið var velta á fasteignmarkaði rúmlega 2,3 milljarðar en var í fyrri viku tæplega 1,9 milljarðar. Veltan á einni viku nú var því í meðallagi en meðalvelta á viku frá áramótum er um 2,3 milljarðar en þá hefur 71 samningi verið þinglýst að meðaltali á viku frá áramótum.
Á ársgrundvelli hefur velta á fasteignamarkaði dregist saman um 52% og gefur það heildstæðari mynd af fasteignamarkaði. Kaupsamningum hefur fækkað milli ára og er vægi hvers kaupsamnings meira fyrir vikið. Auk þess getur hver samningur falið í sér fleiri en eina eign auk þess sem eignir eru mismunandi.
Meðalvelta á hvern samning í vikunni var 28,6 milljónir króna en í fyrri viku var meðalvelta á hvern samning 28,3 milljónir. Meðalvelta á hvern samning frá áramótum er um 34 milljónir.
