Félag í eigu Karls Wernerssonar, Aurláki ehf. hefur verið úrskurðað í gjaldþrotaskipti, en félagið hefur verið úrskurðað til að greiða þrotabúi Milestone rúmlega 970 milljónir króna.

Eins og Viðskiptablaðið sagði frá á sínum tíma, þegar Héraðsdómur úrskurðaði fyrst í málinu þá átti fyrirtækið ekki fyrir skuldinni, ef niðurstaðan yrði staðfest í Hæstarétti.

Það var síðan gert 1. febrúar síðastliðinn og var félagið úrskurðað í gjaldþrotaskipti 21. febrúar síðastliðinn. Lyfjaverslunarkeðjan Lyf og heilsa var á vormánuðum 2008 seld út úr Milestone samsteypunni, sem varð gjaldþrota árið 2009. Keðjan skilaði 1,5 milljarða hagnaði árin 2011 til 2016 .

Milestone var í eigu bræðranna Karls og Steingríms Wernersona , meðan Karl á alla hluti Aurláka, en héraðsdómur og síðar Hæstiréttur féllust á rök þrotabús Milestone um að tilgangur sölunnar hefði verið að koma keðjunni undan gjaldþrotinu.