*

mánudagur, 30. nóvember 2020
Innlent 22. maí 2020 14:40

Félagsmenn Eflingar samþykkja samning

Kjarasamningur Eflingar við Samband íslenskra sveitarfélaga var samþykktur af félagsmönnum Eflingar í dag.

Ritstjórn
Sólveig Anna Jónsdóttir, formaður Eflingar
Eyþór Árnason

Félagsmenn Eflingar sem starfa hjá Kópavogsbæ, Seltjarnarnesi, Mosfellsbæ, Hveragerði og Ölfus hafa greitt atkvæði um kjarasamning sem undirritaður var 10. maí. 

Af þeim 118 sem greiddu atkvæði um samninginn sögðu 117 eða 99,15% já. Aðeins einn greiddi atkvæði gegn samningnum eða 0.85%. Enginn tók ekki afstöðu. Atkvæðagreiðslan var rafræn og stóð frá hádegi mánudaginn 18. maí til hádegis í dag föstudaginn 22. maí.

„Með þessum samningi náðust sambærilegar kjarabætur fyrir félagsmenn okkar sem starfa hjá Kópavogsbæ, Seltjarnarnesi, Mosfellsbæ, Hveragerði og Ölfus og í samningum Eflingar við Reykjavík, ríki og Faxaflóahafnir,“ segir Sólveig Anna Jónsdóttir, formaður Eflingar í tilkynningu félagsins.  

„Við hljótum að fagna því og ég er stolt af staðfestu félagsmanna okkar í verkfallsaðgerðum á erfiðum tímum þar sem samstaðan og baráttuviljinn skilaði þeim sanngjarnri leiðréttingu og betri kjörum.”