*

laugardagur, 27. nóvember 2021
Fólk 6. október 2021 17:08

Fer fyrir eignastýringu Landsbankans

Eyrún Anna Einarsdóttir hefur verið ráðinn framkvæmdastjóri eignastýringar og miðlunar hjá Landsbankanum.

Ritstjórn
Eyrún Anna Einarsdóttir
Aðsend mynd

Eyrún Anna Einarsdóttir hefur verið ráðin framkvæmdastjóri eignastýringar og miðlunar hjá Landsbankanum. Hún tekur við starfinu af Hrefnu Ösp Sigfinnsdóttur sem var nýverið ráðin framkvæmdastjóri Creditinfo á Íslandi. Þetta kemur fram í tilkynningu frá Landsbankanum. 

Ásamt Eyrúnu voru þau Bergsteinn O. Einarsson og Sara Pálsdóttir nýlega ráðin í framkvæmdastjórn bankans. Bergsteinn var ráðinn framkvæmdastjóri áhættustýringarsviðs og Sara tók við samfélagssviði, sem er nýtt svið hjá bankanum.

Sjá einnig: Bergsteinn og Sara í framkvæmdastjórn

Eyrún Anna Einarsdóttir hóf störf hjá Landsbankanum árið 2006. Hún starfaði fyrst við safnastýringu sem heyrði undir eignastýringu bankans og stýrði þeirri einingu á árunum 2010-2012. Undanfarin níu ár hefur Eyrún verið forstöðumaður viðskiptalausna á sviði eignastýringar og miðlunar þar sem hún hefur verið ábyrg fyrir árangursviðmiðum, áætlanagerð og þróun, sem og flestum breytingum og rekstrarmálum sviðsins. Hún hefur leitt innleiðingu á mörgum stærri verkefnum bankans á sviði verðbréfaviðskipta, ásamt því að vera vörustjóri fyrir sparnað og ávöxtun hjá bankanum.

Eyrún er með B.Sc.-gráðu í iðnaðarverkfræði frá Háskóla Íslands, M.Sc.-gráðu í fjárfestingastjórnun frá Háskólanum í Reykjavík og próf í verðbréfaviðskiptum.

Lilja Björk Einarsdóttir, bankastjóri Landsbankans:

„Eyrún er reynslumikill stjórnandi sem hefur starfað lengi á markaðnum og þekkir vel þær daglegu áskoranir sem viðskiptavinir standa frammi fyrir. Eignastýring og miðlun snýst um traust og við leggjum áherslu á langtíma viðskiptasambönd. Eyrún hefur sýnt og sannað að hún er öflugur leiðtogi og hefur sterka sýn á það hvernig Landsbankinn getur skarað fram úr í þjónustu við viðskiptavini. Hún sér hvar tækifæri bankans liggja við að móta nýja tíma í fjármálaþjónustu, auka ánægju viðskiptavina og skila góðri afkomu fyrir bankann.“