Gríðarleg aukning hefur orðið í flugi á milli Keflavíkurflugvallar og Lundúna síðastliðin fjögur ár. Þannig greinir Túristi frá því að vikulegar ferðir hafi verið 19 talsins í febrúarmánuði árið 2012, en í febrúar síðastliðnum voru þær hins vegar 42 talsins.
Aukningin mun hins vegar halda áfram og lítur út fyrir að í febrúar á næsta ári verði ferðirnar 54 talsins í hverri viku. Í febrúar nær ferðamannastraumurinn frá Bretlandi yfirleitt hámarki þar sem skólafrí eru þar í landi sem margir nota til að ferðast.
Í vetur munu tvö stærstu flugfélög Bretlands, British Airways og Easyjet, bjóða upp á áætlunarflug til Íslands frá Lundúnum auk Icelandair og Wow air.
