Fimm útgerðir, af þeim sjö sem stefnt hafa íslenska ríkinu til skaðabóta vegna úthlutunar á aflaheimildum í makríl árin 2011-18, hafa fallið frá málssókn sinni. Þetta kemur fram í tilkynningu frá þeim.
Útgerðirnar sem um ræðir eru Eskja, Gjögur, Ísfélag Vestmannaeyja, Loðnuvinnslan og Skinney-Þinganes. Huginn og Vinnslustöðin standa ekki að yfirlýsingunni.
„Svo sem fram hefur komið munu áhrif heimsfaraldurs kórórunuveirunnar hafa víðtæk áhrif á ríkissjóð og allt íslenskt samfélag. Fyrir endann á því verður ekki enn séð, því miður. Það er hins vegar á svona stundum sem styrkleikar íslensks samfélags koma vel í ljós. Víðtæk samstaða og baráttuhugur hafa einkennt samfélagið síðustu vikur og mánuði. Nú verða allir að leggja lóð á vogarskálarnar,“ segir í yfirlýsingunni.
Samanlögð bótakrafanna útgerðanna sjö hljóðaði upp á 10,2 milljarða króna auk skaðabótavaxta frá setningardegi hverrar úthlutunarreglugerðar fyrir sig. Þá var krafist dráttarvaxta er mánuður var liðinn frá þingfestingu málanna. Samanlagt stóð krafa félaganna í um þrettán milljörðum króna að teknu tilliti til vaxta.
Eftir standa Huginn og Vinnslustöðin en kröfur þeirra tveggja nema samanlagt tæpum tveimur milljörðum króna.
