Íslenska karlalandsliðið verður ekki með í tölvuleiknum FIFA 17 eins og áður hefur komið fram. Geir Þorsteinsson, formaður KSÍ, var í viðtali við The Wall Street Journal í dag, þar sem kom fram að tölvuleikjaframleiðandinn bauð KSÍ 15 þúsund dollara fyrir að vera með í leiknum.
Haft er eftir Geiri í viðtalinu að honum fannst upphæðin of lág fyrir leik af þessari stærðargráðu, því hafi hann neitað tilboðinu. EA Sports tjáði KSÍ að tilboðið væri sambærilegt fyrir lönd á stærð við Ísland og sleit svo viðræðunum, að sögn Geirs.
EA Sports hefur enn ekki svarað fyrirspurnum vegna málsins.
Geir sagði einnig að tölvuleikjaspilarar hér heima væru ósáttir. Honum fannst einnig framkoma tölvuleikjaframleiðandans EA Sports hafi ekki verið til fyrirmyndar og að honum finnst að þeir hafi komið illa fram við KSÍ.
