„Skeytasendingar milli ráðherra ríkisstjórnarinnar síðustu daga koma verulega á óvart. Þær endurspegla mjög ólíka afstöðu til þessa grundvallarsmáls. Gagnvart erlendum fjárfestum hljóta skilaboðin að vera ruglingsleg, í besta falli, og ólíklegt að þau virki hvetjandi," segir Finnur Oddsson, framkvæmdastjóri Viðskiptaráðs Íslands.
Viðskiptaráð og Íslandsstofa standa fyrir morgunverðarfundi þar sem fjallað verður um áhrif beinnar erlendrar fjárfestingar á endurreisn íslensks hagkerfis og efnahagsþróun til framtíðar.
Yfirskrift fundarins er: Arðrán eða ávinningur? Bein erlend fjárfesting og áhrif á endurreisn
Á meðal ræðumanna er Carlos Bronzatto, framkvæmdastjóri World Association of Investment Promotion Agencies (WAIPA), sem er ráðgefandi við stefnumótun ríkja á sviði erlendra fjárfestinga. Á fundinum mun Aðalsteinn Leifsson, lektor við viðskiptadeild Háskólans í Reykjavík, kynna tillögur starfshóps um stefnu stjórnvalda varðandi beina erlenda fjárfestingu hér á landi.
„Það er almennt viðurkennt að erlend fjárfesting er einn af mikilvægu drifkröftum endurreisnar hagkerfisins og og kemur í raun fram með skýrum hætti í samstarfsyfirlýsingu stjórnarflokkanna,“ segir Finnur.
