Finnur Sveinbjörnsson, formaður skilanefndar Kaupþings hefur verið ráðinn forstjóri Nýja Kaupþings en bankinn var stofnaður um helgina.
Samkvæmt heimildum Viðskiptablaðsins kemur þetta fram í tölvupósti sem sendur hefur verið frá starfsmannasviði bankans á starfsmenn hins nýja banka.
Áður hefur Finnur starfað í fjármálaráðuneytinu og Seðlabankanum en var síðast bankastjóri Sparisjóðabankans (áður Icebank) auk þess sem hann hefur verið ráðgjafi forsætisráðherra í efnahagsmálum.
Stjórnarformaður bráðabirgðastjórnar er Ólafur Hjálmarsson hagstofustjóri.
Aðrir stjórnarmenn eru Helga Óskarsdóttir, Einar Gunnarsson, Jónína Björg Bjarnadóttir og Sigurður Þórðarson.