Finnur Sveinsson hefur verið ráðinn til Landsbankans í stöðu sérfræðings í samfélagslegri ábyrgð.
Staða sérfræðings í samfélagslegri ábyrgð er ný í Landsbankanum og mun starfsmaðurinn leiða stefnumótun og starf bankans í samfélagslegri ábyrgð og njóta til þess liðsinnis yfirstjórnar og hóps starfsmanna. Finnur hefur störf í janúar.
Þetta kemur fram í tilkynningu frá Landsbankanum en yfir 90 manns sóttu um starfið þegar það var auglýst um miðjan október.
Finnur er viðskiptafræðingur frá Háskóla Íslands og starfaði í Íslandsbanka að loknu námi en hélt svo til Svíþjóðar þar sem hann lauk námi í umhverfisfræði. Að því loknu hóf hann störf sem ráðgjafi og hefur unnið við ráðgjöf á sviði umhverfismála frá árinu 1998 í í Svíþjóð, en þar rak hann fyrirtæki sem hét NOMIK AB. Frá miðju ári 2007 hefur Finnur rekið FSV Ráðgjöf hér á landi.
Finnur hefur unnið að fjölbreyttum verkefnum á sviði samfélagslegrar ábyrgðar, til dæmis umhverfisvottunar vöru og þjónustu í samræmi við norræna umhverfismerkið Svaninn, ISO 14001 vottun fyrirtækja, innleiðing vistvænna innkaupa opinberra aðila á Íslandi, verkefnastjórn sjálfbærniverkefna Alcoa Fjarðaáls og Landsvirkjunar á austur- og norðurlandi auk viðskiptaþróunarverkefna með áherslu á sjálfbærni.
Frá miðju ári 2006 hefur Finnur starfað mikið fyrir Alcoa Fjarðaál (AF) að margvíslegum verkefnum. Hann hefur komið að og leitt á vissum sviðum uppbyggingu umhverfis- og samfélagsmála hjá AF. Þessu til viðbótar sá hann um samningaviðræður við marga birgja Fjarðaáls, innanlands og erlendis og byggði upp viðskiptasambönd við þá.
