Sáralitlar líkur eru á því að nýtt frumvarp um stjórn fiskveiða verði samþykkt á þessu þingi og taki gildi sem lög næsta haust, samkvæmt heimildum Fiskifrétta sem fjalla um málið í dag. Enn er mikill ágreiningur um efni og framgang málsins í röðum stjórnarflokkanna.
Fiskifréttum er tjáð að til umræðu hafi komið að leika einhvers konar millileik til þess að friða þá sem óánægðastir eru, til dæmis í tengslum við hugsanlega aukningu þorskaflaheimilda á yfirstandandi fiskveiðiári. Þessum nýju heimildum kynni þá að verða úthlutað með einhverjum sambærilegum hætti og menn hugsa sér í ná fram með frumvarpinu. Þá yrði hluta af aukningunni úthlutað samkvæmt aflahlutdeild og hinn hlutinn boðinn gegn gjaldi. Einnig hafa verið vangaveltur um að setja frekari takmarkanir á útflutning á óunnum fiski.
