*

þriðjudagur, 3. ágúst 2021
Innlent 14. janúar 2017 11:36

Fitch: Jákvætt lánshæfismat á ný

Lánshæfismat ríkissjóðs hefur verið breytt svo horfurnar eru nú taldar jákvæðar. Hálfu ári eftir að það gerðist síðast hækkaði lánshæfismatið sjálft.

Ritstjórn
vb.is

Matsfyrirtækið Fitch hefur byrt nýtt lánshæfismat fyrir ríkissjóð þar sem kemur fram að horfurnar séu nú jákvæðar, en áður voru þær metnar stöðugar. Í erlendri og innlendri mynt voru langtímaeinkunnir þó staðfestar áfram óbreyttar með einkunnina BBB+.

,,Að mati Fitch hefur dregið verulega úr veikleika gagnvart ytri áföllum  með styrkingu krónunnar og uppbyggingu óskuldsetts gjaldeyrisforða Seðlabankans, en einnig hafa lækkandi skuldahlutfall hins opinbera og kröftugur hagvöxtur áhrif á breyttar horfur," segir í frétt fjármálaráðuneytisins um málið.

Það sem helst gæti haft áhrif á lánshæfismat ríkissjóðs til hækkunar eru áframhaldandi hagvöxtur án þess að komi til efnahagslegs ójafnvægis, frekari viðnámsþróttur gegn erlendum áföllum með frjálsu fjármagnsflæði og áframhaldandi lækkun skuldahlutfalls með skynsamlegri ríkisfjármálastefnu.

Ofhitnun hagkerfisins vegna víxlverkunar launa og verðlags, verðbólguskot, mikið fjármagnsútflæði sem myndi leiða til þrýstings á gengi krónunnar og ytra ójafnvægis eða slaki í ríkisfjármálum gæti aftur á móti leitt til lækkunar lánshæfismatsins.

Þess má geta að matsfyrirtækið breytti horfum á lánshæfi ríkissjóðs í jákvæðar í janúar 2015 og í júlí sama ár var lánshæfismatið hækkað og horfur metnar stöðugar."

Stikkorð: Fitch hagvöxtur ríkissjóður horfur