Íbúar Fjarðabyggðar voru þeir launahæstu á landinu á síðasta ári samkvæmt tölum frá Ríkisskattstjóra. Viðskiptablaðið gerði úttekt á tekjum og eignum íbúa 10 stærstu sveitarfélaga landsins auk Seltjarnarness, Vestmannaeyja, Ísafjarðarbæjar og Fljótsdalshéraðs.
Meðallaun í Fjarðabyggð voru tæplega 547 þúsund krónur á mann og var um að ræða 35,5% raunhækkun frá aldamótum, en 2.552 launþegar voru skráðir á svæðinu. Meðal helstu vinnuveitenda sveitarfélagsins eru álver Alcoa á Reyðarfirði, Síldarvinnslan í Neskaupstað, Loðnuvinnslan á Fáskrúðsfirði og Eskja á Eskifirði. Þess má geta að í tölunum er einnig tekið tillit til fólks í hlutastarfi og má því gera ráð fyrir að laun fólks í fullu starfi séu að meðaltali eitthvað hærri.
Páll Björgvin Guðmundsson, bæjarstjóri Fjarðabyggðar, segir mikinn stíganda hafa verið í samfélaginu undanfarin ár. Hann segir að sterk staða sjávarútvegs hafi gegnt stóru hlutverki og sömuleið is hafi miklar framkvæmdir átt sér stað. Uppgangurinn hafi verið mikill frá hruni og því sé fyrst og fremst að þakka sterkum útflutningsgreinum.
„Þetta er í raun ekkert flóknara en það. Þjónustufyrirtæki á svæð inu hafa einnig verið að eflast, ferðamennskan hefur aukist og það er mjög mikið að gera hérna,“ segir Páll Björgvin. Hann segist ekki sjá fyrir endann á uppganginum en viðurkennir hins vegar að ákveðnar blikur séu á lofti.
„Við erum að horfa fram á mjög litla loðnuveiði í vetur og þá hefur gengið styrkst. Þetta þýðir minni tekjur í samfélaginu og ég hef smá áhyggjur af því,“ segir Páll. Gengisstyrkingin komi sér hins vegar vel að öðru leyti, þar sem innkaup verða ódýrari vegna minni verðbólgu.
Eignarstaða íbúa Fjarðabyggð ar hefur styrkst töluvert frá árinu 2000, eða um tæp 40% að raunvirði. Páll segir að eftirspurn eftir fasteignum á svæðinu hafi aukist umtalsvert undanfarin ár, sérstaklega á Reyðarfirði, Fáskrúðsfirði og Eskifirði. Það skýri hækkunina að einhverju leyti.
Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð .