Bjarni Benediktsson fjármálaráðherra segir að fjárfestar sem komi með gjaldeyri til landsins geri það vegna þess að þeim lítist vel á efnahagsaðstæður á Íslandi og þeir fái ágæta vexti á fjármagn sitt. Þetta kemur fram í Morgunblaðinu í dag.
Þetta séu ekki eingöngu skammtímafjárfestar, heldur einnig fjárfestar sem séu að dreifa sínu eignasafni og hugsi til lengri tíma. Þeir hafi þess vegna trú á því að krónan geti jafnvel styrkst við haftaafnámið enda séu engin teikn á lofti um að krónan sé að fara að veikjast. „Með góðum vöxtum og í styrkingarfasa er Ísland bara nokkuð áhugaverður fjárfestingakostur,“ segir Bjarni.
„Að mörgu leyti eru kjöraðstæður nú til þess að taka stór skref varðandi það að hleypa öðrum fjárfestum út, eins og lífeyrissjóðunum,“ segir hann ennfremur.
Í nýútkominni yfirlýsingu sendinefndar Alþjóðagjaldeyrissjóðsins um stöðu efnahagsmála hérlendis segir að þensla í hagkerfinu kalli á aukið aðhald peningastefnu og þrátt fyrir andstöðu úr ýmsum áttum sé fyllilega réttmætt að seðlabankinn hækki vexti enn frekar. Það muni festa trúverðuleika Seðlabankans enn frekar í sessi.