*

miðvikudagur, 4. ágúst 2021
Innlent 21. mars 2015 14:15

Fjármagnstekjuskattur ýtir undir áhættusækni

Núverandi fyrirkomulag við innheimtu fjármagnstekjuskatts dregur úr sparnaði og ýtir undir áhættusækni að mati Viðskiptaráðs.

Kári Finnsson
Björn Brynjúlfur Björnsson hagfræðingur Viðskiptaráðs
Aðsend mynd

Hið opinbera hafði á síðasta ári um 150 milljarða króna í tekjur af skattheimtu á fjármagn á síðasta ári eða um 20% af heildarskatttekjum ríkis og sveitarfélaga. Fjármagnstekjuskattur á Íslandi er 20% og er almennt lægri en gengur og gerist á öðrum Norðurlöndum. Fjármagnstekjuskattur leggst á nafnávöxtun fjármagns en það þýðir að verð­ bólga veldur því að skattlagningin verður hærri á sparnað en ella. Björn Brynjúlfur Björnsson, hagfræðingur Viðskiptaráðs, benti á þessa neikvæðu afleið­ingu fyrirkomulags við innheimtu fjármagnstekjuskatts á fundi VÍB um stöðu og stefnu íslensks skattkerfis í síðustu viku.

Í erindi sínu fjallaði Björn um hvaða áhrif skattkerfið hefði á hegðun og lífskjör fólks og nefndi í því sambandi að fyrirkomulag fjármagnstekjuskatts drægi ekki aðeins úr hvata fólks til að spara heldur ýtir það einnig undir áhættusækni. Í dæmi sem hann notaði máli sínu til stuðnings tók hann fyrir nafnávöxtun áhættulausrar eignar frá síðustu aldamótum. Á meðan það fjármagn ávaxtast um átta prósentustig má gera ráð fyrir því að verðmæti hennar rýrni um tæp sex prósent vegna verðbólgu. Þannig yrði raunávöxtun fjárfestingarinnar 2,3%. Þar sem fjármagnstekjuskatturinn er síðan lagður á nafnávöxtun verð­ ur skattheimtan 1,6% eða um 72% af raunávöxtun fjárfestingarinnar.

Íslendingar spara of lítið

„Það hefur farið hátt í umræðunni og Seðlabankinn hefur m.a. bent á það að Íslendingar spara of lítið og við teljum að skattkerfið og hinn hái fjármagnstekjuskattur á sparnað sé stór áhrifaþáttur í því samhengi,“ segir Björn.

Nánar er fjallað um málið í Viðskiptablaðinu. Áskrifendur geta nálgast pdf-útgáfu af blaðinu með því að smella á hlekkinn Tölublöð.