Viðskiptaráð Íslands hefur birt stutt myndband þar sem fjármagnstekjuskattur er útskýrður, en Viðskiptaráð gefur reglulega út myndbönd um hin ýmsu málefni sem útskýrð eru á einni mínútu.
Í myndbandinu er útskýrt hvernig fjármagnstekjuskattur sé lagður á eignatekjur fólks, til dæmis vexti, leigutekjur, söluhagnað og arðgreiðslur. Í dag er skattprósentan um 22% og hefur sú prósenta hækkað um 10% á innan við áratug og um 2 prósentustig um síðustu áramót.
Ýmsar ástæður eru fyrir því að skattprósenta fjármagnstekjuskatts er minni heldur en á launatekjum. Tvær meginástæður þessa er í fyrsta lagi að þegar er búið að greiða 20% tekjuskatt af hagnaði fyrirtækja, þegar einstaklingur greiðir skatt af arðgreiðslum en í öðru lagi tekur fjármagnstekjuskatturinn ekki tillit til verðbólgu.
Fyrr á þessu ári gaf Viðskiptaráð Íslands út skoðun þar sem fjallað er um samspil verðbólgu, ávöxtunar og fjármagnstekjuskatts. Í þeirri skoðun kemur meðal annars fram að meiri verðbólga leiði af sér hærri fjármagnstekjuskatt sem leiði af sér auknar tekjur í ríkissjóð. Þannig verður minni hvati fyrir stjórnvöld að halda aftur af verðbólgu. Sökum þessa hefur verið boðuð endurskoðun á stofni fjármagnstekjuskatts.
Þá er einnig bent á að neilvæð áhrif fjármagnstekjuskatts séu víðtækari en virðist í fyrstu. Meðal annars getur núverandi fyrirkomulag fjármagnstekjuskatts valdið meiri sveiflum í sparnaði. Hins vegar myndi skattlagning raunávöxtunar í stað nafnávöxtunar draga úr sveiflum í ávöxtun, þar sem raunávöxtun eftir skatt er stöðugri ef raunávöxtun er skattlögð. Sveiflur í ávöxtun geta jafnframt dregið úr hvata fólks til að spara þar sem fleiri eru áhættu fælnir en áhættusæknir en núvernandi fyrirkomulag ýtir undir áhættusækni.
