Sjónvarpsþáttaröðin Fjársjóður framtíðar, sem helguð var fjölbreyttum vísindarannsóknum við Háskóla Íslands, mun keppa um gullverðlaun í flokki bestu vísindastuttmynda ársins á vísindamyndahátíðinni AFO í Tékklandi. Í tilkynningu frá HÍ segir að um sé að ræða eina virtustu kvikmyndahátíð í Evrópu á sviði heimilda- og fræðslumynda um vísindi. Fyrsti þátturinn í röðinni um Fjársjóð framtíðar verður sýndur sérstaklega á hátíðinni en hún verður haldin nú í apríl í háskólaborginni Olomouc.
AFO-hátíðin (International Festival of Science Documentary Films – Academia Film Olomouc) er ein sú elsta á þessu sviði í Evrópu og mun fagna hálfrar aldar afmæli á næsta ári. Árlega keppa margir helstu framleiðendur heims á sviði vísindamynda um verðlaun á hátíðinni en í hópi þeirra eru m.a. sjónvarpsstöðvarnar BBC, National Geographic og Discovery Channel. Íslenska þáttaröðin var valin til þátttöku af sérstakri dómnefnd eða akademíu sem tekur árlega ákvörðun um þær myndir sem sýndar eru á hátíðinni.
Til viðbótar þessu hafa finnska (YLE) og sænska ríkissjónvarpið (SVT) ákveðið að taka þáttaröðina til sýningar á rásum sínum. Verður hún sýnd á YLE 5, sem er fyrir sænskumælandi Finna, og UR, sem er fræðslustöð SVT í Svíþjóð.
Þættirnir úr röðinni Fjársjóður framtíðar voru sýndir á RÚV sumarið 2013 og vöktu mikla athygli. Markmiðið með þáttunum var að veita sýn á hið fjölbreytta rannsóknastarf sem vísindamenn Háskóla Íslands sinna við afar ólíkar aðstæður og var þeim fylgt við rannsóknir á ferð og flugi víða um land. Þættirnir náðu til vísindarannsókna á öllum fræðasviðum Háskóla Íslands en í brennipunkti voru þó rannsóknir sem tengjast auðlindum Íslands, ekki síst hafinu og víðernum. Þá var hugað að málefnum innflytjenda auk þess sem glæpir og refsing komu við sögu. Til stendur að endursýna þættina nú í vor.
Handrit að þáttunum unnu Björn Gíslason, kynningarstjóri á markaðs- og samskiptasviði Háskóla Íslands, Jón Örn Guðbjartsson, sviðsstjóri markaðs- og samskiptasviðs Háskóla Íslands, og Konráð Gylfason kvikmyndaframleiðandi.
