Viðskiptaráð birti í morgun lista yfir fjögur atriði í samkeppnislögum sem ráðið segir til marks um að löggjöfin sé meira íþyngjandi hér á landi miðað við annars staðar á Norðurlöndunum.
Töluverð umræða hefur sprottið upp um samkeppnislög á Íslandi í vikunni eftir að Atvinnu- og nýsköpunarráðuneytið birti drög að frumvarpi til breytinga á löggjöfinni.
Inngrip í fyrirtæki óháð broti, er efst á lista Viðskiptaráðs, sem segir að ólíkt því sem tíðkast á Norðurlöndunum sé Samkeppniseftirlitinu (SKE) heimilt að grípa inn í rekstur fyrirtækja óháð því hvort lög hafi verið brotin.
Haldlagning gagna, er næst á listanum og segir ráðið SKE hafa að meginreglu heimild til að leggja hald á gögn við rannsókn ólíkt því sem tíðkast á Norðurlöndunum.
Undanþága til samstarfs, er þriðja dæmið á listanum. Hér þurfi fyrirtæki samþykki Samkeppniseftirlitsins til að hefja samstarfs sem hagnast neytendum á meðan aðeins þurfi að tilkynna um samstarfið á hinum Norðurlöndunum.
Málskotsréttur SKE til að kæra úrskurð æðra stjórnvalds til dómstóla, er síðasta dæmið á lista Viðskiptaráðs, sem segir slíka heimild ekki til staðar í öðrum löndum Norðurlandanna
