Farþegum sem fara um Keflavíkurflugvöll mun fjölga um 18% á næsta ári og verða þeir 10,4 milljónir samkvæmt spá Isavia um farþegafjölda að því er kemur fram í frétt mbl.is . Hlynur Sigurðsson framkvæmdastjóri viðskiptasviðs Keflavíkurflugvallar kynnti spánna á fundi félagsins í morgun.
Mest fjölgun er talin verða á meðal skiptifarþega sem millilenda eingöngu á flugvellinum á leið sinni á milli Evrópu og Norður-Ameríku eða 33%. Þá er reiknað með að heldur dragi úr fjölgun komu- og brottfararfarþega en hún verður um 10% samkvæmt spánni.
Þá er jafnframt talið að draga muni úr árstíðasveiflunni á næsta ári og fjölgun farþega utan álagstíma verði á bilinu 10-20% samanborið við 4% fjölgun í júní, júlí og ágúst.
Gangi spáin eftir mun farþegafjöldi hafa fjórfaldast á átta árum og ríflega tvöfaldast frá árinu 2015 en Isavia hyggst fara í framkvæmdir fyrir 15 milljarða króna á næstu árum til að mæta áframhaldandi vexti.
