Flatbökustaðurinn Flatey Pizza mun opna á Garðatorgi í Garðabæ í byrjun sumars, gangi allt samkvæmt áætlun. Sindir Snær Jensson, einn eigenda Flateyjar staðfesti þetta í samtali við Vísi .

Húsnæðið sem mun koma til með að hýsa staðinn er að Garðartorgi 6, en asíski veitingastaðurinn Nü Asian fusion var áður í rýminu.

Umræddur staður verður þriðji Flateyjarstaðurinn. Fyrsti staðurinn opnaði úti á Granda árið 2017 og í lok árs 2018 var annar staður opnaður í Hlemmi mathöll.

Sindir segir í samtali við Vísi að útlit nýja staðarins á Garðartorgi verði svipað og það er á staðnum úti á Granda, en þó verði lögð meiri áherslu á „take-away“ þjónustu á veitingastaðnum í Garðabænum.