Fleiri fyrirtæki innan Samtaka iðnaðarins (SI) telja krónuna henta sem gjaldmiðil fyrir sinn atvinnurekstur nú í ár heldur en í fyrra.
Þetta kemur fram í könnun sem SI létu gera og fjallað er um í Morgunblaðinu í dag. Þannig segja 38% svarenda nú að krónan henti sem gjaldmiðill en í fyrra svöruðu 29% þátttakenda á sömu lund. Lítil breyting er á hlutfalli þeirra fyrirtækja sem telja krónuna henta illa. Þannig sögðu 23% svarenda að hún hentaði frekar eða mjög illa en í fyrra var hlutfallið 24%.
Í viðtali við Morgunblaðið segir Almar Guðmundsson, framkvæmdastjóri SI, niðurstöðurnar í sjálfu sér ekki koma honum á óvart en leiða megi að því líkur að fylgni sé á milli afstöðunnar til gjaldmiðilsins og þess uppgangs sem orðið hefur í efnahagslífinu hér á landi á undanförnum árum.