*

mánudagur, 19. ágúst 2019
Innlent 5. febrúar 2019 13:08

Floti Wow air gæti minnkað meira

Samkvæmt heimildum Túrista er nú til skoðunar að fækka þotunum ellefu um tvær til þrjár í viðbót.

Ritstjórn
Skúli Mogensen, forstjóri og eigandi WOW air.
Haraldur Guðjónsson

Flugvélafloti Wow air samanstendur nú af 11 þotum og hefur Skúli Mogensen, forstjóri og eigandi Wow air, sagt að endurskipulagning flugfélagsins byggi á þeim fjölda flugvéla. En samkvæmt heimildum Túrista er hins vegar nú til skoðunar að fækka þotunum um tvær til þrjár í viðbót. Þessi breyting myndi hafa talsverð áhrif á farþegafjölda WOW air og áform um rúmlega 2 milljónir farþega í ár gætu því verið í hættu. Wow air flaug sem dæmi með 1,6 milljónir farþega árið 2016, en þá voru þoturnar 9 á fyrri helmingi ársins en bættust svo þrjár breiðþotur við á seinni helmingnum. Túristi greinir frá þessu.

Túristi hefur samkvæmt fréttinni ekki fengið svör frá Skúla Mogensen við fyrirspurn um þessa meintu fækkun í flugflota félagsins. En líkt komi fram í umfjöllun CNBC í gær, þá telur Ben Baldanza, fyrrum stjórnarmaður í WOW air og samstarfsfélagi William Franke, stjórnanda Indigo Partners, að Franke muni gera kröfu um að stjórna flugleiðum og flota WOW air ef hann á endanum fjárfestir í félaginu. Frestur sem Indigo Partners hefur til að ganga frá samningi við Skúla rennur út í lok febrúar samkvæmt þeim breytingum sem skuldabréfaeigendur félagsins gáfu samþykki sitt fyrir nýverið.

Wow air gerði í hittifyrra samning um leigu á fjórum nýjum breiðþotum. Til stóð að fyrri tvær kæmu hingað til lands í þessum mánuði. Túristi hefur samkvæmt frétt sinni ekki fengið svör frá Wow air né eiganda flugvélanna hvort Wow air sé ennþá skuldbundið til að taka við þotunum. Leiga á einni slíkri vél gæti numið hátt í 100 milljónum á mánuði.

Stikkorð: Skúli Mogensen Wow air