*

föstudagur, 14. ágúst 2020
Innlent 9. júlí 2020 13:22

Flytur strandaglópa til Armeníu

Icelandair mun flytja á annað þúsund farþega frá Kaliforníu til Yerevan í Armeníu, sem fengu nýlega leyfi til að snúa aftur heim.

Ritstjórn
Haraldur Guðjónsson

Icelandair mun á næstunni flytja á annað þúsund armenskra og bandarískra ríkisborgara á milli Los Angeles í Kaliforníu og Yerevan í Armeníu. Farþegarnir hafa verið strandaglópar vegna Covid-19 heimfaraldursins en hafa nú fengið heimild og tækifæri til að snúa til síns heima. 

Um er að ræða sérverkefni á vegum Loftleiða Icelandic sem unnið er í samvinnu við stjórnvöld í Armeníu, flutningafyrirtækið Cross Line og kjörræðismann Íslands í Armeníu. Þá hefur íslenska utanríkisþjónustan aðstoðað við tilurð verkefnisins.

Boeing 767 vélar Icelandair verða nýttar í verkefnið en þær taka um 260 farþega. Flogið er um Ísland sem liggur nokkurn veginn um miðja vegu milli Kaliforníu og Armeníu. 

Fyrsta flugið fer frá Los Angeles laugardaginn 11. júlí og fyrsta flug frá Yerevan fer mánudaginn 13. júlí. Fjöldi flugferða liggur ekki enn fyrir en sem fyrr telur farþegafjöldinn á annað þúsund. Um milljón manns af armenskum uppruna búa í og við Los Angeles.

Þjónustan um borð verður í samræmi við núverandi verklagsreglur Icelandair. Um 9-12 manns verða í hverri áhöfn, öllu jafna 2-3 flugmenn, sex flugfreyjur- og þjónar og einn flugvirki. 

„Með því að nýta reynslu, þekkingu og alla innviði Icelandair Group hefur starfsfólk Loftleiða Icelandic, í samstarfi við ýmsar deildir samstæðunnar, sýnt mikla útsjónarsemi þegar kemur að sérverkefnum í leiguflugi. Þessi flug eru kærkomin viðbót við fraktflug frá Kína til Evrópu og Norður Ameríku sem Icelandair Group hefur sinnt á undanförnum vikum," er haft eftir Boga Nils Bogasyni, forstjóra Icelandair Group, í fréttatilkynningu.

„Verkefni sem þessi færa félaginu auknar tekjur og skapa störf fyrir starfsfólk þar sem undirbúningur og skipulag fer fram hér á landi. Þetta er gott dæmi um þann sveigjanleika sem Icelandair Group og dótturfélög þess búa yfir til að taka að sér verkefni sem þessi með skömmum fyrirvara.“

Stikkorð: Icelandair