Fjármálaeftirlitið (FME) hefur gert Hf. Eimskipafélagi Íslands að greiða stjórnvaldssekt að fjárhæð 20 milljónir króna.

Sektina fær félagið vegna frestunar á birtingu innherjaupplýsinga vegna fjárhagserfiðleika Innovate Holdings Ltd, dótturfélags Eimskips í Bretlandi síðastliðið vor.

Þetta kemur fram í tilkynningu frá Eimskipafélaginu.

Forsaga málsins er hér birt óbreytt út tilkynningu Eimskipafélagsins:

Eimskip keypti 55% hlut í Innovate í Bretlandi árið 2006 og eignaðist síðar allt félagið árið 2007.

Í febrúar sl. voru málefni Innovate til umræða á stjórnarfundi og kom þá fram að áætlanir vegna Innovate voru ekki að ganga eftir. Álitið var að um tímabundnar þrengingar væri að ræða og ákvað stjórnin að styðja við Innovate líkt og oft er gert þegar félög eru talin ganga í gegnum tímabundna erfiðleika.

Að mati félagsins voru á þessum tíma ekki til staðar skýrar upplýsingar hjá Eimskip um að fjárhagsstaða Innovate væri jafn slæm og síðar kom í ljós, þar er að afskrifa þyrfti Innovate í heild sinni úr bókum Eimskips.

Hefði það verið skoðun fyrrum stjórnenda og stjórnar félagsins að fjárhagsstaða Innovate væri jafn slæm og síðar kom í ljós hefði stjórnin eðli málsins samkvæmt ekki tekið þá ákvörðun um að styðja við Innoavate með verulegum fjárframlögum fram í maí. Þannig kom mat félagsins á fjárhagsstöðu Innovate beinlínis fram í aðgerðum þess.

Þann 20. febrúar síðastliðinn hætti þáverandi forstjóri félagsins og aðstoðarforstjóri tók við starfinu tímabundið þar til núverandi forstjóri var ráðinn í maí sl. til félagsins.

Á aðalfundi félagsins 18. mars síðastliðinn var ný stjórn félagsins kosin og tóku þrír nýir stjórnarmenn sæti í stjórninni. Á fundi í byrjun maí síðastliðinn var kynnt mun alvarlegri staða hjá Innovate en áður var talið og tók stjórn félagsins þá í kjölfarið ákvörðun um að hætta fjárstuðningi við Innovate. Ákvörðunin var tekin á þeim grundvelli að staða Innovate væri mun alvarlegri en fyrrum stjórnendur og stjórn töldu.

Þá tók stjórn félagsins ákvörðun um að fresta birtingu upplýsinga um rekstrarvanda Innovate til að vernda lögmæta hagsmuni Innovate, Eimskips, hluthafa, kröfuhafa, starfsmanna og viðskiptavina Innovate. Var unnið eftir enskum lögum og samkvæmt ráðgjöf þarlendra ráðgjafa og lögmanna.

Strax í kjölfarið var unnið að því með breskum ráðgjöfum að koma eignum Innovate í söluferli og áhersla lögð á að fá sem mest verðmæti fyrir eignir Innovate til að takmarka tjón vegna gjaldþrots Innovate, fyrir Eimxskip og kröfuhafa Innovate.

Hefðu upplýsingar um yfirvofandi gjaldþrot Innovate verið birt á þeirri stundu telur stjórn Eimskips ljóst að veruleg verðmæti hefðu tapast, þar sem viðskiptavinir og starfsmenn Innovate hefðu líklega yfirgefið félagið og þar með hefði verðmæti rekstrar orðið mjög takmarkað. Stjórn félagsins með stjórnendur þess unnu málið í góðri trú meðal annars með breskum ráðgjöfum og lögmönnum.

Stjórn Eimskips telur sig hafa haft fullgildar heimildir til að fresta tímabundið birtingu upplýsinga um erfiðleika í rekstri Innovate og það er mat stjórnar að upplýsingaskylda félagsins hafi myndast í maí.

Með því að fresta tímabundið birtingu upplýsinga um rekstrarvanda Innovate frá maí fram í júní var stjórn Eimskips að vernda lögmæta hagsmuni og forða félaginu frá frekari tjóni.

Telur stjórn Eimskips að tekist hafi að vernda hagsmuni kröfuhafa Innovate og aflétta ábyrgðum sem Eimskip var í fyrir Innovate, einkum ábyrgð gagnvart Glitni banka hf., samtals að fjárhæð 9,5 milljónir GBP.

Loks var verið eftir fremsta megni að vernda hagsmuni kröfuhafa sem Innovate bar skylda til samkvæmt enskum lögum.

Fjármálaeftirlitið hefur komist að þeirri niðurstöðu að félagið hafi brotið gegn lögum um verðbréfaviðskiptum með því að tilkynna ekki strax í febrúar um erfiðleika í rekstri Innovate.

Ekki er fallist á rökstuðning Eimskips um að upplýsingaskylda hafi fyrst stofnast í maí og heimilt hafi verið að fresta birtingu upplýsinga. Kemur fram í ákvörðun FME að brotið hafi staðið í afar langan tíma, tæplega 4 mánuði, og að á tímabilinu voru umtalsverð viðskipti með hluti í félaginu.

Slíkt umfang viðskipta á tímabilinu auk þeirrar breytinga sem voru á gengi hluta í félaginu eftir birtingu upplýsinganna auka alvarleika brots félagsins og er lýsandi fyrir þau áhrif sem þetta hafði á markaðinn, einkum fyrir þá aðila sem keyptu hluti í félaginu á tímabilinu.

Þá taldi FME að Eimskip hafi ekki getað sýnt fram á að undanþáguákvæði 3. mgr. 122. gr. laga um verðbréfaviðskipti hafi verið fullnægt og því hafi Eimskip brotið gegn 1. mgr. 122. gr. um tafarlausa tilkynningu innherjaupplýsinga.

Fram kemur í ákvörðun FME að viðurlögum sé beitt óháð því hvort lögbrot séu framin af ásetningi eða gáleysi sbr. 4. mgr. 141. gr. laga um verðbréfaviðskipti. Þá kemur fram á ákvörðun FME að tilgreind lagagrein geri ekki sérstakan greinarmun á stigi ásetnings eða gáleysis.

Var það jafnframt mat stjórnar FME að ekki sé ástæða til að vísa málinu til refsimeðferðar hjá ríkislögreglustjóra, heldur sé það þess eðlis að rétt sé að ljúka því með stjórnvaldssekt í samræmi við heimildir FME. Við ákvörðun fjárhæðar stjórnvaldssektar var litið til atvika máls og fyrirliggjandi gagna, sérstaklega með tilliti til alvarleika brotsins og háttsemi stjórnenda Eimskips, tímabilsins sem brotið náði yfir og umfangs þeirra viðskipta sem urðu á tímabilinu.

Þótti hæfilegt að gera Eimskip að greiða stjórnvaldssekt að fjárhæð 20 milljónir króna. Félagið mun fara yfir forsendur ákvörðunarinnar með lögmönnum sínum og í kjölfarið taka ákvörðun um hvort það höfði mál til ógildingar ákvörðunarinnar fyrir dómstólum, en félagið hefur til þess þrjá mánuði.