Fjármálaeftirlitið hefur ákveðið að stöðva tímabundið viðskipti með skuldabréfaflokk með auðkenni FAST-1 12 sem tekinn hefur verið til viðskipta á Nasdaq OMX Iceland hf.
FAST I slhf. sendi í morgun frá sér tilkynningu til Kauphallarinnar og segir Fjármálaeftirlitið, með vísan í þá tilkynningu, að það sé mat Fjármálaeftirlitsins að skuldabréfaflokkurinn uppfylli ekki þær kröfur sem gerðar eru til töku til viðskipta.
Í tilkynningu frá FAST-1 slhf. til Kauphallarinnar segir að uppgötvast hafi þann í fyrradag að ekki hafi verið staðið með fullnægjandi hætti að veðsetningu til tryggingar á þeim fasteignum sem getið er til um í skilmálum útboðslýsingar vegna útgáfu skuldabréfaflokks með auðkenni FAST-1 12 1.
Nánar tiltekið hafði annars vegar orðið dráttur á þinglýsingu tryggingabréfa og hins vegar hafði láðst að þinglýsa aðilaskiptum að áhvílandi tryggingarbréfum.
Í tilkynningu segir jafnframt að útgefandi hafi nú þegar brugðist við og gefið út fullnægjandi tryggingarskjöl sem móttekin hafa verið af sýslumannsembættinu til að fullnægja umræddum skilyrðum um sérstaka skuldbindingu samkvæmt skilmálum í útboðslýsingu en sýslumannsembættið tekur sér nokkra daga til að skrá inn umrædd veðréttindi.
Þá mun útgefandi tilkynna opinberlega þegar þinglýsingu framangreindra trygginga er lokið og skilmálum útboðslýsingar hefur verið fullnægt.