Fjármálaeftirlitið (FME) hefur lagt  stjórnvaldssektir á tæplega 30  aðila frá miðju ári  2007 til ársloka  2008.

Um er að ræða álagningu stjórnvaldssekta vegna brota á lögum um vátryggingastarfsemi, lögum um fjármálafyrirtæki og lögum um verðbréfaviðskipti.

Þá var þremur málum vísað til lögreglu en þetta kemur fram á vef FME í dag þar sem birtar eru upplýsingar um álagningu stjórnvaldssekta.

Þar er jafnframt greint frá því að hæsta sekt sem FME hefur lagt á lögaðila nemur 20 milljónum króna en hæsta sekt sem lögð hefur verið á einstakling nemur 1 milljón króna.

Þá kemur fram að nokkur málanna sneru að brotum gegn reglum um virka eignarhluti samkvæmt lögum um fjármálafyrirtæki. Með virkum eignarhlut er átt við beina eða óbeina hlutdeild í fyrirtæki sem nemur 10% eða meira af eigin fé, stofnfé eða atkvæðisrétti, eða aðra hlutdeild sem gerir kleift að hafa veruleg áhrif á stjórnun viðkomandi fyrirtækis.  Meðal annars var um að ræða brot sem laut að því að ekki var sótt fyrirfram um að fara með virkan eignarhlut, eins og lög gera ráð fyrir.

Þá kemur jafnframt fram að eitt mál sneri að broti gegn lögum um fjármálafyrirtæki vegna viðskipta starfsmanna við fjármálafyrirtæki. Lögin kveða á um að samningur fjármálafyrirtækis um lán, ábyrgðir, kauprétt eða sambærileg viðskipti við framkvæmdastjóra sé  háð samþykki stjórnar fyrirtækisins.

Á tímabilinu var eitt fjármálafyrirtæki sektað vegna brots á tilkynningarskyldu, 38. gr. laga um fjármálafyrirtæki, vegna misbrests á því að tilkynnt væri um fyrirhugaða starfsemi erlendis, áður en hún hófst.

Þá var á tímabilinu í tveimur tilvikum sektað vegna brots á reglum um virka eignarhluti í lögum um vátryggingastarfsemi.

Sjá nánar vef FME.