Fjármálaeftirlitið (FME) ítrekar á heimasíðu sinni í dag að stofnunin hafi undanfarin ár leitast eftir því að gefa erlendum aðilum sem til hennar hafi leitað eins góðar upplýsingar sem mögulegt var innan ramma laga.
Þar með er FME að svara þeim sem að mati stofnunarinnar hafa tjá sig að undanförnu um samskipti Fjármálaeftirlitsins við erlenda aðila
„Ýmsir aðilar hafa tjáð sig að. Því hefur verið slegið fram að Fjármálaeftirlitið hafi verið í hlutverki klappstýru og verndað bankana fyrir erlendri gagnrýni,“ segir á vef FME.
„Fjármálaeftirlitið leitast við að gefa bestu fáanlegar upplýsingar um starfsemi sína og íslenskan fjármálaþjónustumarkað og hefur byggt upplýsingagjöf sína til erlendra aðila á tölulegum staðreyndum hverju sinni sem og gildandi lögum.“
Þá kemur fram að bankarnir hafi stækkað hlutfallslega mest á árunum 2004-2005, meðal annars vegna kaupa á erlendum dótturfélögum.
Í samræmi við aukna erlenda starfsemi íslensku bankanna hafi áhugi ýmissa erlendra aðila á Íslandi aukist verulega árið 2006. Beiðnum um upplýsingar og fundi hafi fjölgað umtalsvert og FME lagt áherslu á að sinna þessum beiðnum af fagmennsku.
Þá kemur fram að um var að ræða greiningaraðila, lánshæfismatsfyrirtæki, fjölmiðla og fjármálafyrirtæki og fundirnir hafi verið að frumkvæði hinna erlendu aðila.
„Um var að ræða aðila sem komu til Íslands m.a. til þess að kynna sér aðstæður og hitta ýmsa aðila s.s. aðrar stofnanir, ráðuneyti og aðila á fjármálamarkað,“ segir á vef FME.
„Fjármálaeftirlitið lagði sig fram við að sinna upplýsingabeiðnum og veita þær upplýsingar sem hægt var innan ramma laga og var lögð áhersla á að setja fram staðreyndir. Á fundunum var m.a. farið yfir þær áskoranir sem Fjármálaeftirlitið taldi að fjármálamarkaðurinn og fjármálafyrirtæki stæðu frammi fyrir, svo sem fjármögnun og þröngt eignarhald.“
