FoodCo, sem starfrækir tuttugu veitingastaði undir sjö vörumerkjum, hagnaðist um 144 milljónir króna á síðasta ári. Þetta kemur fram í tilkynningu frá fyrirtækinu.
Velta fyrirtækisins nam 3,5 milljörðum króna á árinu og jókst hún um 7% á milli ára. Rekstrarhagnaður fyrir afskriftir og fjármagnsliði (EBITDA) nam 355 milljónum króna samanborið við 224 milljónir króna ári fyrr, og jókst hann því um 58% á milli ára.
Eigið fé í árslok nam 1,2 milljörðum króna og var eiginfjárhlutfallið 66%. Vaxtaberandi skuldir námu 45 milljónum króna.
Veltumesta árið frá stofnun
Jóhann Þórarinsson, forstjóri FoodCo, segir að árið hafi verið í takti við væntingar og jafnframt það veltumesta frá stofnun.
„Aukin einkaneysla og mikil fjölgun ferðamanna er að skila sér í aukinni veltu inná stöðunum og stefnan er sú að vaxa ennfrekar í framtíðinni enda eru skilyrði til vaxtar afar góð um þessar mundir og mjög jákvæðar horfur á veitingamarkaðnum ef horft er til næstu 3-5 ára,“ segir Jóhann.
FoodCo á og rekur veitingastaðina Aktu taktu, Eldsmiðjuna, Greifann, Saffran, Pítuna, American Style og Roadhouse. Um 500 manns vinna á veitingastöðum fyrirtækisins víða um land.