Nýsköpunarverðlaun forseta Íslands verða afhent við hátíðlega athöfn á Bessastöðum klukkan þrjú í dag. Markmið verðlaunanna er að heiðra námsmenn sem unnið hafa framúrskarandi starf við úrlausn verkefna sem styrkt eru af Nýsköpunarsjóði námsmanna. Við athöfnina munu forseti Íslands, formaður stjórnar Nýsköpunarsjóðs námsmanna og fulltrúi nemenda í stjórn sjóðsins flytja ávörp.
Fimm verkefni eru tilnefnd til verðlaunanna í ár:
- Hjólaleiðir á Íslandi sem unnið var af Evu Dís Þórðardóttur og Gísla Rafni Guðmundssyni.
- Hönnun á rafsegulfastefni, verkefni sem Fannar Benedikt Guðmundsson vann.
- Myndræn framsetning uppskrifta sem þeir Kai Köhn, Karl Andrés Gíslason og Marínó Páll Valdimarsson unnu
- Myndræn málfræði fyrir börn greind með einhverfu og málhömlun, unnin af Karen Kristínu Ralston.
- Útsetningar á íslenskum þjóðlögum fyrir einleiksfiðlu og fiðludúó; þær gerði Sigrún Harðardóttir.