*

sunnudagur, 18. ágúst 2019
Innlent 15. maí 2019 12:22

Forsetinn opnar nýja fjölorkustöð

Í dag breytist bensínstöð Orkunnar norðan við Miklubraut í fyrstu fjölorku-stöð landsins.

Ritstjórn
Guðni Th. Jóhannesson, forseti Íslands, mun mun flytja ávarp og taka stöðina formlega í notkun.
Haraldur Guðjónsson

Í dag, miðvikudaginn 15. maí breytist bensínstöð Orkunnar norðan við Miklubraut í fyrstu fjölorku-stöð landsins þar sem ökumenn og aðrir notendur munu, auk hefðbundins jarðefnaeldsneytis, geta keypt nær alla endurnýjanlega orkugjafa sem framleiddir eru til samgangna í landinu. Metangasið kemur frá urðunarstað SORPU í Álfsnesi, hraðhleðsla fyrir rafmagns- og tengitvinnbíla frá Orku náttúrunnar og þá verður hægt að fá vetni frá Orku náttúrunnar sem framleitt er með rafgreiningu í Hellisheiðarvirkjun. Greint er frá þessu í fréttatilkynningu.

Fjölorkustöðin við Miklubraut er samstarfsverkefni sem hefur verið í undirbúningi um nokkurt skeið og er styrkt af Evrópusambandinu um tvær milljónir evra. Verkefnisstjórn og þróun hefur verið í höndum Íslenskrar NýOrku en stöðin verður rekin og er í eigu Orkunnar.  Forseti Íslands Guðni Th. Jóhannesson mun flytja ávarp og taka stöðina formlega í notkun með því að fylla á þrjá vistvæna bíla með innlendum endurnýjanlegum orkugjöfum. Opnunarathöfnin hefst á Orkustöðinni við Miklubraut  kl. 12:30 í dag. 

„Það er einstakt að fá að taka þátt í opnun stöðvar sem býður alla vistvæna kosti á Íslandi. Orkan er að taka risaskref í samfélagslegri ábyrgð og ég er sannfærður um að þessa dags verður minnst í orkusögu þjóðarinnar. Nú er mikilvægt að fyrirtæki og opinberir aðilar fylgi fordæmi Orkunnar og setji sér markmið að kaupa aðeins bíla sem nota vistvænt eldsneyti þannig að eftirspurn aukist og hægt verði að byggja upp enn frekari innviði," er haft eftir Jóni Birni Skúlasyni, framkvæmdastjóra Íslenskrar NýOrku í tilkynningunni. 

Það eru tímar breytinga í samgöngum sem í felast bæði tækifæri og áskoranir. Við höfum mótað okkur skýra stefnu og ætlum að vera leiðandi í þeim breytingum, vinna þær í sátt við samfélagið og með opnun fjölorkustöðvarinnar á Miklubraut sýnum við það í verki. Orkan sem orkufélag framtíðarinnar fagnar því þessum áfanga í sögu félagsins," segir Hendrik Egholm, forstjóri Skeljungs, sem er eigandi Orkunnar, tilkynningunni.