*

mánudagur, 27. september 2021
Erlent 3. júlí 2013 17:51

Forstjóri Zynga stígur frá

Netleikjafyrirtækið Zynga hefur ekki átt góða daga á hlutabréfamarkaði. Stórvesír frá Microsoft tekur við stýrinu.

Ritstjórn
Mark Pincus á góðri stundu.

Mark Pincus, forstjóri og stofnandi netleikjafyrirtækisins Zynga, ætlar að stíga upp úr forstjórastólnum á mánudag í næstu viku. Við starfi hans tekur Don Mattrick, framkvæmdastjóri Xbox-deildar hugbúnaðarrisans Microsoft. Pincus verður þess í stað stjórnarformaður Zynga og aðalleikjahönnuður fyrirtækisins. 

Fjallað er um málið á vef bandaríska dagblaðsins The Wall Street Journal . Þar er m.a. tæpt á því hversu illa Zynga hefur gengið á hlutabréfamarkaði frá því hlutabréf þess voru tekin til viðskipta í desember árið 2011. Gengi þeirra hefur hrunið um heil 70% síðan þá. Þá er fjárhagsstaða fyrirtækisins ekki með besta móti, tekjur ekki verið í takt við væntingar og var tilkynnt í síðasta mánuði að 18% af starfsliði fyrirtækisins verði sagt upp. 

Zynga á nokkra af þekktustu netleikjum heims. Þar á meðal eru Farmville og álíka leikir. 

Stikkorð: Zynga Xbox Mark Pincus