Fossar markaðir hafa fengið starfsleyfi Fjármálaeftirlitsins sem verðbréfafyrirtæki á grundvelli laga um fjármálafyrirtæki. Þetta kemur fram í tilkynningu.
Þar segir að aukið starfsleyfi geri Fossum mörkuðum kleift að veita viðskiptavinum sínum víðtækari þjónustu en áður og sé liður í að efla starfsemi fyrirtækisins.
„Við hjá Fossum stefnum að því að vera leiðandi og óháður þjónustuaðili á fjármálamarkaði hér á landi. Þetta er því mikilvægur áfangi fyrir okkur í uppbyggingu fyrirtækisins,” segir Haraldur Þórðarson, framkvæmdastjóri Fossa. Hann segir að með leyfinu geti félagið nú veitt viðskiptavinum sínum fjölbreyttari þjónustu, m.a. vörsluþjónustu og fjárfestingarráðgjöf.
Fossar markaðir hóf starfsemi í apríl á þessu ári. Félagið er með skrifstofur á Seljavegi 2 í Reykjavík og þar starfa sex starfsmenn. Eigendur Fossa markaða eru Haraldur Þórðarson, Steingrímur Arnar Finnsson, Sigurbjörn Þorkelsson og Aðalheiður Magnúsdóttir.
