Gunnhildur Sveinsdóttir hefur verið ráðin regluvörður og lögfræðingur í lögfræðiráðgjöf hjá Sjóvá. Hún hefur þegar hafið störf hjá Sjóvá.
Gunnhildur hefur reynslu af bæði regluvörslu og lögfræðiráðgjöf í gegnum fyrri störf sín hjá Arion banka (áður Kaupþing banka), þar sem hún hefur starfað frá árinu 2002. Síðastliðin 4 ár hefur hún verið lögfræðingur í regluvörslu hjá bankanum en áður gegndi hún meðal annars starfi hópstjóra í lögfræðiráðgjöf og forstöðumanns lögfræðiinnheimtu bankans.
Gunnhildur lauk embættisprófi í lögfræði frá lagadeild Háskóla Íslands árið 2002. Hún er með próf í verðbréfaviðskiptum og hefur málflutningsréttindi fyrir héraðsdómi.
Gunnhildur er í sambúð með Brynjari J. Péturssyni, lögfræðingi hjá Útlendingastofnun og eiga þau þrjár dætur.