*

mánudagur, 9. desember 2019
Fólk 16. október 2019 14:32

Frá Heimavöllum til Borgarplasts

Guðbrandur Sigurðsson fyrrum forstjóri Heimavalla hefur verið ráðinn framkvæmdastjóri Borgarplasts.

Ritstjórn
Guðbrandur Sigurðsson hefur tekið við sem forstjóri Borgarplasts af Hauki Skúlasyni. Guðbrandur var framkvæmdastjóri Heimavalla frá 2016 til mars á þessu ári.
Haraldur Guðjónsson

Guðbrandur Sigurðsson hefur verið ráðinn framkvæmdastjóri Borgarplasts hf. og hefur hann þegar hafið störf. Hann var framkvæmdastjóri Plastprents 2010-2012, framkvæmdastjóri PwC 2013-2016 og framkvæmdastjóri Heimavalla frá 2016 til loka mars á þessu ári.

Guðbrandur starfaði í sjávarútvegi um árabil, síðast sem framkvæmdastjóri ÚA og Brims á árunum 1996-2004. Þá var hann forstjóri Mjólkursamsölunnar á árunum 2005-2008. Guðbrandur er með B.Sc. próf í matvælafræði frá Háskóla Íslands og MBA próf frá Edinborgarháskóla.

Fráfarandi framkvæmdastjóri félagsins Haukur Skúlason leiddi sameiningu félagsins við Plastgerð Suðurnesja á síðasta ári og uppbyggingu á nýrri öflugri verksmiðju fyrir frauðkassa á Ásbrú í Reykjanesbæ sem tók nýlega til starfa.

Borgarplast framleiðir fiskikör, frauðkassa fyrir ferskan fisk og lax, frauðeinangrun og ýmsar fráveitulausnir á borð við brunna, olíuskiljur og rotþrær. Á Völuteigi 31 í Mosfellsbæ rekur Borgarplast hverfisteypu fyrir fiskikör og svipaðar vörur þar sem er einnig aðalskrifstofa félagsins. Hjá félaginu starfa 38 starfsmenn.

Guðbrandur segir Borgarplast vera spennandi fyrirtæki með rekstur sem hvíli á traustum og gömlum grunni. „Félagið hefur mörg góð tækifæri til að sækja fram og stækka. Umhverfismál munu móta rekstur félagsins í framtíðinni eins og allra annarra umbúðafyrirtækja en félagið er í dag að endurvinna frauð og hyggst auka endurvinnslu af slíku tagi,“ segir Guðbrandur.

„Ný og öflug frauðverksmiðja á Ásbrú gerir okkur kleift að þjóna betur framleiðendum á ferskum fiski og laxi, hvoru tveggja greinar sem eru í mikilli sókn. Félagið býr að góðu starfsfólki sem hefur langa og góða reynslu í að framleiða lausnir sem henta aðstæðum á Íslandi og erlendis og þjóna viðskiptavinum þess. Stærsta eigandi Borgarplasts er framtakssjóður í umsjá Alfa sem er öflugur bakhjarl fyrir félagið og þau verkefni sem það stendur frammi fyrir í dag.“