United Silicon hf. segist hafa reynt að gera allt sem í valdi félagsins stóð til að tryggja að undirverktaki félagsins fylgdi reglum íslensk vinnumarkaðar.

Félagið vill koma þessu á framfæri vegna fréttaflutnings fjölmiðla um málefni undirverktakans Metal Mont sem Viðskiptablaðið fjallaði um í síðustu viku.

Sagði ASÍ tilboð um byggingu gashreinsistöðvar fyrirtækisins hafa borið einkenni þess að þar hafi farið fram gerviverktaka og undirboð á vinnumarkaði.

Höfðu frumkvæði að verktaki uppfyllti reglur

„United Silicon hf. lagði sig fram við að tryggja að undirverktakinn færi í einu og öllu að íslenskum lögum og allt væri gert samkvæmt kjarasamningum,“ segir í tilkynningu félagsins.

„United Silicon hf. hafði frumkvæði að því að undirverktakinn uppfyllti örugglega þær reglur sem gilda á íslenskum vinnumarkaði og fól lögmanni sínum að tryggja að samningarnir væru í lagi og svo var gert.

Vinnumálastofnun staðfesti að samningarnir væru í lagi

Í því sambandi voru ráðningarsamningar undirverktakans við starfsmenn sína sendir til Vinnumálastofnunar, sem staðfesti að samningarnir væru í lagi og launaákvæði þeirra uppfylltu kjarasamninga Starfsgreinasambandsins og Samtaka atvinnulífsins, sem félagið er aðili að.

Eftir athugun Vinnumálastofnunar, sem fór fram á árinu 2015, gerði undirverktakinn nokkrar breytingar á ráðningarsamningum starfsmannanna sinna, svo þeir uppfylltu öll ákvæði íslenskra kjarasamninga.

United Silicon hf. gerði því allt, sem í valdi félagsins stóð, til að tryggja að undirverktakinn fylgdi öllum lögum og reglum á íslenskum vinnumarkaði.“