Halldór Jörgensen, framkvæmdastjóri Microsoft á Íslandi, er meðal nýrra eigenda DV og á í félagið með Boga Emilssyni, Framkvæmdastjóra DV, tæplega 16% hlut í félaginu.
Sem kunnugt er leiddi Reynir Traustason, ritstjóri DV, hóp fjárfesta í lok mars sem keyptu það að Birtíngi, félagi í eigu Hreins Loftssonar.
Þegar hefur verið greint frá því að Reynir og Lilja Skaftadóttir, listverkasali, séu stærstu eigendur blaðsins en saman eiga þau um 64,5% hlut.
Í dag er síðan birtur á dv.is listi yfir eigendur blaðsins. Þá kemur í ljós að óstofnað félag í eigu þeirra Boga og Halldórs eigi tæpan 16% hlut sem er stærsti einstaki hluturinn á eftir þeim Reyni og Lilju.
Fram kemur á vef blaðsins að samþykkt hafi verið einróma að í lögum DV væri kveðið á um að enginn hluthafi réði meira en 26% atkvæðamagns í ákvörðunum félagsins, hversu stóran hlut sem hann ætti í félaginu.
Hluthafar í DV ehf. eru eftirfarandi:
- Reynir Traustason, ritstjóri DV 33.04%
- Lilja Skaftadóttir Hjartar, listaverkasali, búsett í Frakklandi 31.47%
- Óstofnað félag í eigu Boga Emilssonar, framkvæmdastjóra DV, og Halldórs Jörgenssonar, yfirmanns Microsoft á Íslandi, 15.74%
- Catalina ehf, í eigu Steingríms Stefnissonar 3.15%
- Arev verðbréfafyrirtæki hf. 2.36%
- Jón Trausti Reynisson, ritstjóri DV 2.12%
- Ingi F. Vilhjálmsson, blaðamaður DV 1.57%
- Hildur Helga Sigurðardóttir fjölmiðlakona 1.57%
- Dagmar Una Ólafsdóttir jógakennari 1.57%
- Meiriháttar ehf, í eigu Sigurdórs Sigurðssonar framkvæmdarstjóra 1.57%
- Þórir Jökull Þorsteinsson prestur 1.57%
- Gísli Jónsson hjartalæknir 1.57%
- Kolbeinn Þorsteinsson, blaðamaður DV 0.79%
- Víkurós ehf, réttingarverkstæði í Reykjavík, í eigu feðganna Hjartar Erlendssonar og Erlends Hjartarsonar 0.79%
- Hrafn Margeirsson bifreiðarstjóri 0.79%
- Sigríður Sigursteinsdóttir ellilífeyrisþegi 0.31%