Framtakssjóður Íslands hélt aðalfund síðastliðinn föstudag en þar var ársreikningur sjóðsins samþykktur. Hagnaður Framtakssjóðs Íslands nam tæplega 7 milljörðum króna. Þetta kemur fram í fréttatilkynningu frá sjóðnum.

Á fundinum var samþykkt að greiddur yrði arður að fjárhæð  7.000 milljónir til hluthafa. Að auki var samþykkt að hlutafé félagsins yrði lækkað um kr. 3.200.000 að nafnverði. Alls verða því greiddir 10,2 milljarðar króna til eigenda sjóðsins, sem eru að langstærstum hluta lífeyrissjóðir. Skýringin á þessari háu útgreiðslu skýrist aðallega af sölu á dótturfélögum Invent Farma á seinasta ári og sölu dótturfélaga innan Icelandic.

Frá stofnun Framtakssjóðsins árið 2009 hefur Framtakssjóður Íslands alls greitt 69,1 milljarð króna í arð til hluthafa sinna frá upphafi en kallað inn 43,3 milljarða. Í stjórn Framtakssjóðs Íslands sitja nú: Þorkell Sigurlaugsson stjórnarformaður, Guðrún Björg Birgisdóttir, Helga Árnadóttir, Hjörleifur Pálsson og Sveinn Hannesson.

Stærstu hluthafar í sjóðnum eru íslenskir lífeyrissjóðir. Lífeyrissjóður verzlunarmanna á nálega 20 prósent hlut, Landsbankinn á 17,7 prósent hlut, Gildi lífeyrissjóðir á 16,5 prósent eignarhlut og Birta lífeyrissjóður 14,4 prósent hlut.