Framtíðin námslánasjóður hf. og Endurmenntun Háskóla Íslands hafa gert með sér samstarfssamning. Samkvæmt samningnum mun Framtíðin bjóða upp á námslán til þeirra sem hyggjast stunda nám við ákveðnar námsbrautir Endurmenntunar, að uppfylltum lánaskilyrðum sjóðsins. Þetta kemur fram í fréttatilkynningu.
Námsbrautirnar eru eftirfarandi:
- Jákvæð sálfræði - diplómanám á meistarastigi
- Hugræn atferlismeðferð - undirstöðuatriði
- Sérnám í hugrænni atferlismeðferð fyrir geðlækna og sálfræðinga
- Verkefnastjórnun og leiðtogaþjálfun
- Framkvæmdaferli mannvirkjagerðar
- Leiðsögunám á háskólastigi
- Löggilding fasteigna-, fyrirtækja-, og skipasölu
- Fjölskyldumeðferð – diplómanám á meistarastigi
Samningurinn var undirritaður af Hlíf Sturludóttur, stjórnarformanni Framtíðarinnar og Kristínu Jónsdóttur Njarðvík, endurmenntunarstjóra Háskóla Íslands, í dag á skrifstofum Endurmenntunar Háskóla Íslands
Framtíðin er námslánasjóður sem hóf göngu sína í upphafi árs. Markmið sjóðsins er að veita námsmönnum framfærslu- og/eða skólagjaldalán hvort sem þeir eru á leið í nám á Íslandi eða erlendis.
