Héraðsdómur Reykjavíkur hafnaði kröfu ríkisins um að vísa frá máli Ólafs Ólafssonar á hendur ríkissaksóknara og íslenska ríkinu. Mál Ólafs verður því tekið til efnislegrar umfjöllunar fyrir héraðsdómi. Þetta kemur fram í tilkynningu.
Ólafur stefndi ríkinu í október síðastliðinn og krafðist ógildingar á úrskurði endurupptökunefndar þar sem hafnað var endurupptöku á þætti hans í svonefndu Al-Thani máli. Í lögum um endurupptökunefnd segir að ákvarðanir hennar séu endanlegar og verði ekki skotið til dómstóla. Aðalkrafa embættis ríkislögmanns um frávísun málsins byggði á þeim rökum fyrir héraðsdómi. Kröfunni var hafnað með þeim rökum að ekki mega girða fyrir synjun endurupptökunefndar sé borin undir dómstóla.
„Stjórnvöld eiga að bregðast við og leiðrétta alvarleg mistök í réttarkerfinu, líkt og þau sem gerð voru við meðferð Al-Thani málsins. Og þótt hafa megi á því ákveðinn skilning að sumir hverjir séu orðnir þreyttir á málarekstri vegna rannsókna og dómsmála síðustu ára, þá tel ég mikilvægt að berjast fyrir því að fólk njóti sannmælis og réttlátrar málsmeðferðar. Réttindi fólks verður að tryggja,“ segir Ólafur Ólafsson.
Ólafur segir það fagnaðarefni að dómurinn fallist á rök að dómstólar eigi að dómstólar eigi að geta haft úrskurðarvald um ákvarðanir nefndarinnar. „Endurupptökunefnd er óháð stjórnsýslunefnd og heyrir undir framkvæmdavaldið og það er stjórnarskrárvarinn réttur borgaranna að bera lokaákvarðanir stjórnsýslunnar undir dómstóla.“
„Ólafur Ólafsson hafði einnig gert kröfu um að viðurkennt yrði að skilyrði fyrir endurupptöku Al-Thani málsins væru uppfyllt. Þeirri kröfu hafnaði héraðsdómur á þeirri forsendu að með því væru dómstólar að taka nýja ákvörðun sem endurupptökunefnd hefði verið falið, þótt dómstólar myndu eftir sem áður geta metið hvort ákvarðanir nefndarinnar væru í samræmi við ákvæði laga.
Málareksturinn á hendur Ólafi Ólafssyni, auk þriggja annarra; Hreiðars Más Sigurðssonar, Sigurðar Einarssonar og Magnúsar Guðmundssonar, hófst með ákæru og málshöfðun embættis sérstaks saksóknara um miðjan febrúar 2012. Í febrúar 2015 var Ólafur sakfelldur í Hæstarétti fyrir hlutdeild í markaðsmisnotkun, en sýknaður af sakargiftum um hlutdeild í umboðssvikum og um hylmingu og peningaþvætti.
Ólafur heldur fram sakleysi sínu og telur að fyrir Hæstarétti hafi bæði sönnunargögn verið rangt metin og að tveir dómarar í málinu hafi verið vanhæfir til setu í dómnum. Í kærunni, sem héraðsdómur tekur nú til meðferðar, er úrskurður endurupptökunefndar varðandi þessar málsástæður sagður rangur og nefndarmaður, sem í nefndina kom eftir að tveir aðrir höfðu sagt sig úr henni, hafi einnig verið vanhæfur til setu í henni. Þá hefur málsmeðferðin verið kærð til Mannréttindadómstóls Evrópu sem skoðar hana með tilliti til mögulegra mannréttindabrota,“ segir einnig í tilkynningunni.
