Slitastjórn Landsbankans hefur enn ekkert heyrt frá stjórnvöldum um undanþágu frá gjaldeyrishöftum svo hægt sé að greiða kröfuhöfum gamla Landsbankans 226 milljarða króna.
Slitastjórnin hefur tvisvar framlengt frest sem hún gaf stjórnvöldum til þess að gefa svör um málið. Páll Benediktsson, upplýsingafulltrúi slitastjórnarinnar, segir í samtali við RÚV að berist svarið ekki í dag falli samkomulag milli slitastjórnarinnar og Landsbankans úr gildi, en það felur í sér að lengt verði í greiðslum af skuld sem Landsbankinn skuldar þrotabúinu.
Bjarni Benediktsson, fjármálaráðherra, segir í samtali við RÚV að hann búist ekki við því að svara slitastjórninni í dag. Það verði ekki gert fyrr en búið sé að ganga frá málinu af hálfu stjórnvalda.
