Fréttaskýring: Jóhanna hefur misst mikið traust

Traust almennings til Jóhönnu Sigurðardóttur, forsætisráðherra og formanns Samfylkingarinnar, hefur dalað verulega frá því að hún varð forsætisráðherra.

Þetta sýnir ný könnun MMR á trausti almennings til forystufólks í stjórnmálum.

Tæp 17% aðspurðra segjast treysta Jóhönnu „frekar eða mjög mikið“ en rúmlega 60% aðspurðra segjast treysta Jóhönnu „frekar eða mjög lítið“. Frá því að MMR birti fyrstu könnun sína á trausti almennings til forystufólks í stjórnmálum hefur traustfylgi við Jóhönnu aldrei mælst minna. Að sama skapi hefur vantraust til Jóhönnu aldrei mælst meira en nú.

Á myndinni hér að ofan má sjá þróunina á trausti til Jóhönnu frá því í desember 2008. Þar sést hvernig þeim hefur fækkað sem segjast treysta Jóhönnu, úr tæpl. 64% í 17% nú. Í desember 2008 voru aðeins tæp 14% sem sögðust vantreysta Jóhönnu en eru nú sem fyrr segir rúm 60%.

Á myndinni hér að neðan má sjá þróun á trausti til Jóhönnu flokkað eftir stuðningi almennings við stjórnmálaflokka. Þar sést hvernig traust til Jóhönnu hefur dalað í öllum flokkum, meira að segja meðal hennar eigin flokksmanna. Í desember 2008 sögðust 83% stuðningsmanna Samfylkingarinnar treysta Jóhönnu en nú segjast tæp 73% treysta henni.

Mest hefur traustið minnkað meðal sjálfstæðismanna. Í desember 2008, þegar Jóhanna var félagsmálaráðherra í ríkisstjórn með Sjálfstæðisflokknum, sögðust 64% stuðningsmanna Sjálfstæðisflokksins treysta Jóhönnu. Í dag segjast aðeins 2,2% sjálfstæðismanna treysta Jóhönnu. Fylgið er ekki mikið meira á meðal framsóknarmanna en 3,6% þeirra segjast treysta Jóhönnu í dag.

Mesta er sveiflan þó á traustfylgi Jóhönnu meðal stuðningsmanna Vinstri grænna (VG). Í desember 2008 sögðust 65% stuðningsmanna VG treysta Jóhönnu. Þeim fjölgaði nokkuð í febrúar 2009, þegar Jóhanna varð forsætisráðherra í ríkisstjórn með VG, en þá sögðust 86% stuðningsmanna VG treysta Jóhönnu. Það traust hefur lækkað þó dalað nokkuð hratt þegar liðið hefur á ríkisstjórnarsamstarfið og var komið niður í 45% í maí 2010. Nú segjast um 50% stuðningsmanna VG treysta Jóhönnu.