Vextir á erlendri lánakörfu Orkuveitu Reykjavíkur (OR), upp á samtals 206 milljarða íslenskra króna, eru í dag 0,9 prósent en með 0,25 % ábyrgðargjaldi eru vaxtabyrðin 1,15%. Það telst mjög lágt en vextirnir taka óbeint mið af vaxtastigi erlendra seðlabanka, sem víðast hvar er nú á bilinu 0-1,5% og hefur sjaldan eða aldrei verið lægra.
Gengisfall íslensku krónunnar hefur haft alvarleg áhrif á efnahag OR. Skuldir hafa hækkað mikið, þar sem þær eru að stærstum hluta í erlendri mynt. Um 75-80 prósent tekna OR eru hins vegar í íslenskum krónum.
Fyrirsjáanlegt er að vextir muni hækka nokkuð í framtíðinni, en þó að líkindum samhliða almennum efnahagsbata. Anna Skúladóttir, framkvæmdastjóri fjármálasviðs OR, segir líklegt að tekjur OR muni hækka samhliða vaxtahækkunum á mörkuðum. "Það er alveg rétt að vextir eru í lágmarki á öllum mörkuðum nema þeim íslenska og ljóst að vextir munu hækka. Sterk tengsl eru á milli verðs hrávöru eins og áls og vaxtastigs. Álverð er þegar komið í uppsveiflu og líklegt að vextir fylgi á eftir. Þannig má gera ráð fyrir að tekjur Orkuveitunnar tengdar álverði sem eru um 20% tekna (í áætlun 2010 eru þessar tekjur 5,6 milljarðar) hækki þegar vextir hækka."
Anna segir í svari við fyrirspurnum Viðskiptablaðsins að EBIDTA OR sé í dag 12 milljarðar og að æskilegt sé að vaxtabyrðin fari ekki yfir 6 milljarða. "Hvert prósent í vöxtum er um 2 milljarðar. Það er erfitt að fullyrða hver þolmörk OR eru en ég myndi segja að æskilegt væri að vaxtabyrði væri ekki meiri en helmingur af EBITDU eða um 6 milljarðar. Það jafngildir 3ja prósenta vöxtum. Helmingur EBITDU væri þá notaður til niðurgreiðslu langtímalána. Orkuveitan getur borið vaxtastig allt að 6% en þá væri öll EBITDA notuð til greiðslu vaxta," segir Anna.
Anna segir einnig rétt að benda á að ef skuldir OR hefðu verið í verðtryggðum krónum hefði skuldsetningin verið meira íþyngjandi og haft meiri áhrif á orkuverð til viðskiptavina. "Ekki hefði verið hægt að halda gjaldskrá svona lágri ef skuldir Orkuveitunnar hefðu verið í meira mæli í verðtryggðum íslenskum krónum. Hækkun gjaldskrár í raforkusölu til smásölu og heitu vatni um 10% hækkar EBITDU um 1,4 milljarða. Horfa verður á þessa þætti þegar þolmörk eru metin," segir Anna.
Stærstur hluti erlendra lána OR er í evrum eða rúmlega 41 prósent. Vaxtastig Seðlabanka Evrópu hefur því umtalsverð áhrif á vaxtabyrði fyrirtækisins.
Myntsamsetning erlendrar lánakörfu OR er annars eftirfarandi:
CAD 1,87%
CHF 20,48%
EUR 41,38%
GBP 4%
JPY 10,46%
SEK 6,93%
USD 14,88%