*

þriðjudagur, 25. júní 2019
Fólk 7. janúar 2019 09:47

Friðrik fer frá RB til að stýra VISS

Friðrik Þór Snorrason forstjóri Reiknistofu bankanna hefur verið ráðinn til að leiða uppbyggingarstarf hjá Viss.

Ritstjórn
Friðrik Þór Snorrason lætur nú af störfum sem forstjóri Reiknistofu bankanna og tekur við Viss. Í hans stað kemur Ragnhildur Geirsdóttir aðstoðarforstjóri Wow air.
Birgir Ísl. Gunnarsson

Friðrik Þór Snorrason hefur ráðið sig sem forstjóra hjá Viss ehf. og verður einn af meðgeigendum félagsins. Friðrik er í dag forstjóri Reiknistofu bankanna (RB) og lætur af störfum þar í lok janúar eftir átta ára starf hjá félaginu. Eins og Viðskiptablaðið sagði frá fyrir helgi hefur Ragnhildur Geirsdóttir aðstoðarforstjóri Wow air verið ráðin í hans stað hjá Reiknistofunni.

Friðrik Þór var áður framkvæmdastjóri tækni- og rekstrarþjónustu fyrirtækisins Skyggnis (nú partur af Origo) 2008-2011 og þar áður framkvæmdastjóri viðskiptaþróunar hjá Nýherja. Friðrik starfaði á árunum 2000-2003 sem forstöðumaður hagdeildar STRAX í Bandaríkjunum.

Menntaður í Bendaríkjunum og Bretlandi

Friðrik lauk BA-prófi í alþjóðasamskiptum frá University of Wisconsin í Bandaríkjunum 1994 og meistaraprófi í sama fagi frá London School of Economics í Englandi 1996. Friðrik Þór Snorrason segir að kominn hefði verið tími til að leita á ný mið eftir að hafa stýrt víðtækum breytingum hjá RB á liðnum átta árum.

„Sprotastarfsemi og nýsköpun hefur alltaf heillað mig. Markmið okkar hluthafana hjá Viss er að stórefla þróun tæknilausna og þjónustu félagsins og að gera Viss að öflugum samstarfsaðila smásölu- og tryggingarfyrirtækja á Íslandi,“ segir Friðrik Þór.

Guðmundur Pálmason stjórnarformaður Viss segir það mikinn feng að hafa fengið Friðrik til liðs við okkur hjá Viss.„Friðrik er gríðarlega öflugur stefnumiðaður stjórnandi sem mun leiða þróun félagsins inn á ný mið lausna og þjónustu,“ segir Guðmundur.

„Ég kynntist Friðriki í gegnum STRAX snemma á hans ferli og áttaði mig fljótt á því hvaða mann hann hafði að geyma. Framundan er mikið uppbyggingarstarf sem verður spennandi fyrir starfsmenn, stjórnendur og stjórn að takast á við. 
Ég vil á þessum tíma líka þakka Baldri Baldurssyni, fráfarandi framkvæmdastjóra Viss, fyrir samstarfið á liðnum árum.“ 

Um Viss ehf.

Viss er sprotafyrirtæki sem sett var á laggirnar í árslok 2014. Félagið býður tryggingar fyrir farsíma og er eina fyrirtækið á Íslandi sem býður upp á farsímatryggingar með lágri sjálfsábyrgð og víðtækri tryggingavernd.

Tryggingar félagsins eru seldar með nýjum farsímum hjá farsímafélögunum og fleiri viðurkenndum söluaðilum
Viss rekur einnig verkstæði fyrir farsíma og veitir þannig íslenskum tryggingafélögum, viðskiptavinum þeirra og farsímanotendum viðgerðarþjónustu og aðstoð við útskipti á skemmdum farsímum.

Viss er einnig viðurkenndur þjónustuaðili Apple á Íslandi og þjónustar Apple farsíma og tölvur í þeirra nafni.

25 ára afmælistilboð VB – 50% afsláttur af áskrift

Afmælistilboð VB

Viðskiptablaðið er 25 ára og af því tilefni býðst nýjum áskrifendum að kaupa áskrift á 50% afslætti.
Afmælisverðið er aðeins 2.500 krónur.

Tilboðið er fyrir nýja áskrifendur. Núverandi áskrifendur geta bætt við sig áskrift á þessu verði. Gildir í 4 mánuði. Áskrifendur fá Viðskiptablaðið, Frjálsa verslun og Fiskifréttir sent ásamt vefaðgangi að vb.is og fiskifrettir.is