Póst og fjarskiptastofnun samþykkti nýlega beiðni Íslandspósts um gjaldskrárhækkun. Í júlí tekur gildi ný gjaldskrá sem þýðir að burðargjald fyrir bréf undir 50 g verður 120 kr. en það er í dag 97 kr.
Rétt er að taka fram að Íslandspóstur hefur einkarétt á því að bera út bréf undir 50 g. Þetta þýðir að gjaldskrá Íslandspósts fyrir bréf sem dreift er í einkarétti hefur nú hækkað um 140% á sjö árum, eða frá því vorið 2005. Á sama tíma hefur vísitala neysluverðs hækkað um 60%. Burðargjald á fjölpósti hefur á sama tímabili einungis hækkað á bilinu 13-16% en Íslandspóstur dreifir fjölpósti í samkeppni við einkaaðila.
Eins og fram kemur í umfjöllunum um málið í Viðskiptablaðinu hefur verð á pósti í einkaréttarhlutanum rokið upp síðustu ár. Frá árinu 2004 hefur hagnaður Íslandspósts vegna útburðar á einkaréttarhlutanum hins vegar snarminnkað og síðustu árin hefur sá liður rekstrarins verið rekinn með miklu tapi.
Rétt er að taka fram að gjaldskrá félagsins á pósti í einkaréttarhlutanum hækkaði ekkert á árunum 2002-4, eða ekki fyrr en í maí 2005. Þá er einnig rétt að taka fram að magn pósts í einkaréttarhlutanum fór ekki að minnka að ráði fyrr en haustið 2008 og hefur síðan þá minnkað um 32%.
Mest hefur gjaldskrárhækkunin verið frá því í maí 2011, en síðan þá hefur gjaldskrá Íslandspósts á pósti sem dreift er í einkarétti verið hækkuð fjórum sinnum. Á rúmu ári hefur gjaldskráin því hækkað um 60%. Verð á fjölpósti hefur ekkert hækkað á sama tíma.
Nánar er fjallað um málið í Viðskiptablaðinu en þar svarar Ingimundur Sigurpálsson, forstjóri Íslandspósts, m.a. fyrir hækkunina. Áskrifendur geta nálgast blaðið undir liðnum tölublöð hér að ofan.
