*

miðvikudagur, 8. desember 2021
Fólk 31. ágúst 2021 16:04

Frosti ráðinn fram­kvæmda­stjóri Olís

Frosti Ólafsson, fyrrum forstjóri ORF líftækni, tekur við af Jóni Ólafi Halldórssyni sem framkvæmdastjóri Olís.

Ritstjórn
Fosti Ólafsson
Eva Björk Ægisdóttir

Frosti Ólafsson hefur verið ráðinn framkvæmdastjóri Olíuverzlunar Íslands og mun hefja störf þann 3. september næstkomandi. Þetta kemur fram í tilkynningu Haga, móðurfélags Olís, til Kauphallarinnar. Frosti tekur við af Jóni Ólafi Halldórssyni sem hætti fyrr í mánuðinum eftir tæplega sjö ára starf.

Frosti hefur áður starfað sem forstjóri ORF líftækni og framkvæmdastjóri Viðskiptaráðs Íslands. Þar áður starfaði hann sem ráðgjafi hjá ráðgjafafyrirtækinu McKinsey & Company þar sem hann vann að stefnumótun, rekstrargreiningum og umbreytingarverkefnum fyrir fjölda alþjóðlegra stórfyrirtækja.

Þá hefur Frosti jafnframt setið í stjórnum ýmissa fyrirtækja á borð við Íslandsbanka, Controlant , Freyju Framtakssjóði og Háskóla Reykjavíkur. Hann lauk MBA námi frá London Business School árið 2012 og er einnig B.Sc. gráðu í hagfræði frá Háskóla Íslands.

Finnur Oddsson, forstjóri Haga:

„Frosti býr að víðtækri og farsælli reynslu af fyrirtækjarekstri, stefnumótun og umbreytingarverkefnum, bæði hér heima fyrir og erlendis. Hann þekkir einnig vel til starfsemi Olís og Haga eftir þátttöku í stefnumótunarvinnu á vegum félaganna síðustu misserin. Það er því sérlega ánægjulegt að fá Frosta til liðs við öflugt teymi hjá Olís, til að takast á við fjölbreytt og áhugaverð verkefni sem bíða félagsins. Það eru spennandi tímar framundan á eldsneytis- og þægindamarkaði, m.a. vegna orkuskipta og breyttrar neysluhegðunar viðskiptavina. Við bjóðum Frosta velkominn í hópinn og hlökkum til samstarfsins.“

Frosti Ólafsson, nýr framkvæmdastjóri Olís:

„Olís er öflugt og rótgróið félag sem hefur spilað mikilvægt hlutverk á íslenskum eldsneytismarkaði í tæpa öld. Það er spennandi tækifæri að fá að leiða þetta sögufræga félag í gegnum þær miklu breytingar sem nú eiga sér stað á eldsneytis- og þægindamarkaði. Ég hef fengið að kynnast Olís og Haga samstæðunni í gegnum ráðgjafastörf mín á undanförnum misserum og það er ljóst að starfsemin byggir á sterkum grunni og tækifærin framundan eru fjölþætt. Ég hlakka mikið til að hefja störf og er þakklátur fyrir það traust sem mér er sýnt.“

Stikkorð: Olís Frosti Ólafsson